main kya karun koi sab mere iKHtiyar mein hai

maiñ kyā karūñ koī sab mere iḳhtiyār meñ hai

safar meñ hai to bahut kuchh magar ġhubār meñ hai

charāġh-e-sub.h se ham lau lagā.e baiThe haiñ

sunā hai jab se ki ik gul bhī is sharār meñ hai

uḌā ke sar vo hathelī pe rakh bhī detā hai

bhalī ye baat to maano ki shahryār meñ hai

kalī khile to garebān yaad aatā hai

ye dukh ḳhizāñ meñ kahāñ thā jo ab bahār meñ hai

hayāt sabza-o-gul se tavīl hai us kī

tumhāre ashk mirā ḳhuun kuchh to ḳhaar meñ hai

hujūm us kī galī meñ hai sarfaroshoñ kā

'suhail' lāġhar o laffāz kis shumār meñ hai

main kya karun koi sab mere iKHtiyar mein hai

safar mein hai to bahut kuchh magar ghubar mein hai

charagh-e-subh se hum lau lagae baiThe hain

suna hai jab se ki ek gul bhi is sharar mein hai

uDa ke sar wo hatheli pe rakh bhi deta hai

bhali ye baat to mano ki shahryar mein hai

kali khile to gareban yaad aata hai

ye dukh KHizan mein kahan tha jo ab bahaar mein hai

hayat sabza-o-gul se tawil hai us ki

tumhaare ashk mera KHun kuchh to KHar mein hai

hujum us ki gali mein hai sarfaroshon ka

'suhail' laghar o laffaz kis shumar mein hai