main kya misal dun koi teri misal ke baad

maiñ kyā misāl duuñ koī tirī misāl ke baad

nahīñ jamāl koī bhī tire jamāl ke baad

atā huī vo bulandī mire taḳhayyul ko

ḳhayāl hech hue sab tire ḳhayāl ke baad

ye tere naam kā sadqa hai sāhib-e-me.arāj

uruuj mujh ko milā hai jo har zavāl ke baad

batāyā huliya-mubārak jo umm-e-ma.abad ne

hasīñ lagā na koī aise ḳhadd-o-ḳhāl ke baad

na lauTā aap ke dar se koī tahī-dāman

na TuuTā maan kisī kā bayān-e-hāl ke baad

nahīñ hai ranj koī jo ḳhushī meñ Dhal na gayā

darūd maiñ ne paḌhā jab kisī malāl ke baad

kanīz-e-āl-e-mohammad agar maiñ kahlā.ūñ

visāl un se hī hogā mirā visāl ke baad

hai 'tāhira' ye tamannā dil-o-nigāh kī ab

madīne jā.ūñ hamesha har ek saal ke baad

main kya misal dun koi teri misal ke baad

nahin jamal koi bhi tere jamal ke baad

ata hui wo bulandi mere taKHayyul ko

KHayal hech hue sab tere KHayal ke baad

ye tere nam ka sadqa hai sahib-e-mearaj

uruj mujh ko mila hai jo har zawal ke baad

bataya huliya-mubarak jo umm-e-mabad ne

hasin laga na koi aise KHadd-o-KHal ke baad

na lauTa aap ke dar se koi tahi-daman

na TuTa man kisi ka bayan-e-haal ke baad

nahin hai ranj koi jo KHushi mein Dhal na gaya

darud main ne paDha jab kisi malal ke baad

kaniz-e-al-e-mohammad agar main kahlaun

visal un se hi hoga mera visal ke baad

hai 'tahira' ye tamanna dil-o-nigah ki ab

madine jaun hamesha har ek sal ke baad