main kya samjhun tere wade se kya izhaar hota hai

maiñ kyā samjhūñ tire va.ade se kyā iz.hār hotā hai

kabhī iqrār hotā hai kabhī inkār hotā hai

kisī se kab kisī ke dard kā iz.hār hotā hai

vahī kuchh ḳhuub kah saktā hai jo bīmār hotā hai

ilāhī ḳhair dohrī choT hai kis tarah uTThegī

dil-e-majrūh meñ paivast phir sūfār hotā hai

barahman jāntā hai mujh ko maiñ jaisā musalmāñ huuñ

mirī tasbīh meñ bhī rishta-e-zunnār hotā hai

zuleḳhā ko mile jazbāt ke iz.hār kā mauqa

abhī bāzār-e-ulfat misr kā bāzār hotā hai

ba-juz zāt-e-ḳhudā kis kā sahārā hai zamāne meñ

musībat meñ bhalā koī kisī kā yaar hotā hai

maza aa.egā rātoñ ko hameñ fariyād karne kā

hamārā mustaqil bistar pas-e-dīvār hotā hai

nigāhoñ meñ huā kartā hai bai.āna mohabbat kā

ye vo saudā nahīñ hai jo sar-e-bāzār hotā hai

nazākat chaar āñkheñ bazm meñ karne nahīñ detī

kisī kī ḳhātir-e-nāzuk pe ye bhī baar hotā hai

masīhā bhī utar aa.eñ to kyā ummīd jiine kī

kahīñ 'mas.ūd' achchhā ishq kā bīmār hotā hai

main kya samjhun tere wade se kya izhaar hota hai

kabhi iqrar hota hai kabhi inkar hota hai

kisi se kab kisi ke dard ka izhaar hota hai

wahi kuchh KHub kah sakta hai jo bimar hota hai

ilahi KHair dohri choT hai kis tarah uTThegi

dil-e-majruh mein paiwast phir sufar hota hai

barahman jaanta hai mujh ko main jaisa musalman hun

meri tasbih mein bhi rishta-e-zunnar hota hai

zuleKHa ko mile jazbaat ke izhaar ka mauqa

abhi bazar-e-ulfat misr ka bazar hota hai

ba-juz zat-e-KHuda kis ka sahaara hai zamane mein

musibat mein bhala koi kisi ka yar hota hai

maza aaega raaton ko hamein fariyaad karne ka

hamara mustaqil bistar pas-e-diwar hota hai

nigahon mein hua karta hai baiana mohabbat ka

ye wo sauda nahin hai jo sar-e-bazar hota hai

nazakat chaar aankhen bazm mein karne nahin deti

kisi ki KHatir-e-nazuk pe ye bhi bar hota hai

masiha bhi utar aaen to kya ummid jine ki

kahin 'masud' achchha ishq ka bimar hota hai