main kyon kahun kisi se zarurat hi kyon na ho

maiñ kyoñ kahūñ kisī se zarūrat hī kyoñ na ho

dil us se be-niyāz hai 'usrat hī kyoñ na ho

mardum-gazīdgī kā asar hai ki aaj tak

Dartā huuñ maiñ fareb-e-mohabbat hī kyoñ na ho

kyā kyā ta'assubāt haiñ duniyā meñ jā-ba-jā

tashvīsh-e-dil fuzūñ hai ki hijrat hī kyoñ na ho

nākām-e-ārzū hai koī dil to kyā huā

taskīn-e-jāñ hai kuchh to vo hasrat hī kyoñ na ho

gūñjegī aur tesha-e-mazdūr kī sadā

har chand ahl-e-zar kī malāmat hī kyoñ na ho

mujh ko nahīñ qubūl ġhulāmī kā lafz bhī

ḳhidmat-guzār-e-vaqt kī ujrat hī kyoñ na ho

husn-e-ḳhayāl ke sivā bantī hai baat kab

husn-e-bayān meñ koī nudrat hī kyoñ na ho

bad-ḳhaslatī se baaz kab aatā hai bad-nihād

kam-zarf o be-zamīr pe lā'nat hī kyoñ na ho

ham bandagān-e-ḳhāk-nashīñ ḳhāksār haiñ

apne liye fuzūl hai satvat hī kyoñ na ho

fasl-e-gul-e-bahār kī ḳhvāhish to kījiye

sahrā-e-zindagī meñ sukūnat hī kyoñ na ho

'rāhī' ḳhulūs-e-dil ke sivā haath kuchh na aa.e

dil meñ darūd vird meñ aayat hī kyoñ na ho

main kyon kahun kisi se zarurat hi kyon na ho

dil us se be-niyaz hai 'usrat hi kyon na ho

mardum-gazidgi ka asar hai ki aaj tak

Darta hun main fareb-e-mohabbat hi kyon na ho

kya kya ta'assubaat hain duniya mein ja-ba-ja

tashwish-e-dil fuzun hai ki hijrat hi kyon na ho

nakaam-e-arzu hai koi dil to kya hua

taskin-e-jaan hai kuchh to wo hasrat hi kyon na ho

gunjegi aur tesha-e-mazdur ki sada

har chand ahl-e-zar ki malamat hi kyon na ho

mujh ko nahin qubul ghulami ka lafz bhi

KHidmat-guzar-e-waqt ki ujrat hi kyon na ho

husn-e-KHayal ke siwa banti hai baat kab

husn-e-bayan mein koi nudrat hi kyon na ho

bad-KHaslati se baz kab aata hai bad-nihad

kam-zarf o be-zamir pe la'nat hi kyon na ho

hum bandagan-e-KHak-nashin KHaksar hain

apne liye fuzul hai satwat hi kyon na ho

fasl-e-gul-e-bahaar ki KHwahish to kijiye

sahra-e-zindagi mein sukunat hi kyon na ho

'rahi' KHulus-e-dil ke siwa hath kuchh na aae

dil mein darud wird mein aayat hi kyon na ho