main musafir-e-rah-e-ishq hun na sahar hai koi na sham hai

maiñ musāfir-e-rah-e-ishq huuñ na sahar hai koī na shaam hai

ye safar azal se abad talak na qiyām hai na maqām hai

maiñ tamām ishq-o-niyāz huuñ vo taġhāful-o-hama-be-ruḳhī

use apne kaam se kaam hai mujhe apne kaam se kaam hai

tirī rahguzar pe mirī nazar mujhe sub.h-o-shām kī kyā ḳhabar

na tire ḳhayāl meñ sub.h hai na tire ḳhayāl meñ shaam hai

vo chaman jahāñ pe hoñ zulf-o-ruḳh vo vatan jahāñ ho koī sanam

yahīñ ahl-e-dil kā maqām hai yahīñ ahl-e-dil kā qiyām hai

tujhe gardishoñ hī se kaam hai kabhī ai falak ye batā mujhe

koī us ke vasl kī sub.h hai koī us ke vasl kī shaam hai

hai ajab fazā mire des kī koī shaiḳh hai koī barahman

mujhe aadmī kī talāsh hai magar aadmī abhī ḳhaam hai

vo jo chup hai shahr hai dasht sā maiñ 'payām' kaise jiyūñ yahāñ

na ab us kā koī payām hai na duā hai aur na salām hai

main musafir-e-rah-e-ishq hun na sahar hai koi na sham hai

ye safar azal se abad talak na qiyam hai na maqam hai

main tamam ishq-o-niyaz hun wo taghaful-o-hama-be-ruKHi

use apne kaam se kaam hai mujhe apne kaam se kaam hai

teri rahguzar pe meri nazar mujhe subh-o-sham ki kya KHabar

na tere KHayal mein subh hai na tere KHayal mein sham hai

wo chaman jahan pe hon zulf-o-ruKH wo watan jahan ho koi sanam

yahin ahl-e-dil ka maqam hai yahin ahl-e-dil ka qiyam hai

tujhe gardishon hi se kaam hai kabhi ai falak ye bata mujhe

koi us ke wasl ki subh hai koi us ke wasl ki sham hai

hai ajab faza mere des ki koi shaiKH hai koi barahman

mujhe aadmi ki talash hai magar aadmi abhi KHam hai

wo jo chup hai shahr hai dasht sa main 'payam' kaise jiyun yahan

na ab us ka koi payam hai na dua hai aur na salam hai