main na ek saat raha aaram mein

maiñ na ik sā'at rahā ārām meñ

gar qafas se chhūT aayā daam meñ

sab pe baalā hī rahī bolī mirī

maiñ jo pahuñchā husn ke nīlām meñ

til tah-e-gesū nahīñ sayyād ne

aaj daana rakh diyā hai daam meñ

hazrat-e-dil ne kiye jurm-o-ḳhatā

be-sabab ham aa ga.e ilzām meñ

āzim-e-mulk-e-adam hai ai masīh

terā bīmār ab to sub.h-o-shām meñ

zulf chhū kar ham ne lī sar par balā

aa.e nāhaq kashmakash ke daam meñ

chashm-o-lab ke bose meñ jo hai maza

vo kahāñ hai pista-o-bādām meñ

un ke ghar jaatā huuñ kah dete haiñ ye

koī kah do vo to haiñ ārām meñ

chāTte haiñ hoñTh sab 'āshiq tire

hai 'ajab lazzat tire dushnām meñ

zulf-o-ruḳh kā hai tasavvur rāt-din

jab se ham dāḳhil hue is laam meñ

murġh-e-bismil haiñ jo ye sayyād aaj

tū ne kyā 'ḳhanjar' rakhā hai daam meñ

main na ek sa'at raha aaram mein

gar qafas se chhuT aaya dam mein

sab pe baala hi rahi boli meri

main jo pahuncha husn ke nilam mein

til tah-e-gesu nahin sayyaad ne

aaj dana rakh diya hai dam mein

hazrat-e-dil ne kiye jurm-o-KHata

be-sabab hum aa gae ilzam mein

aazim-e-mulk-e-adam hai ai masih

tera bimar ab to subh-o-sham mein

zulf chhu kar hum ne li sar par bala

aae nahaq kashmakash ke dam mein

chashm-o-lab ke bose mein jo hai maza

wo kahan hai pista-o-baadam mein

un ke ghar jata hun kah dete hain ye

koi kah do wo to hain aaram mein

chaTte hain honTh sab 'ashiq tere

hai 'ajab lazzat tere dushnam mein

zulf-o-ruKH ka hai tasawwur raat-din

jab se hum daKHil hue is lam mein

murgh-e-bismil hain jo ye sayyaad aaj

tu ne kya 'KHanjar' rakha hai dam mein