main nala-kash jo apne watan se nikal gaya

maiñ nāla-kash jo apne vatan se nikal gayā

ik andalīb thā ki chaman se nikal gayā

hotī nahīñ nabī kī bhī qadr apne shahr meñ

allāh kā habīb vatan se nikal gayā

tanhā.ī bahr-e-āshiq-e-sādiq zarūr hai

majnūñ isī liye to vatan se nikal gayā

naafā se bāhar aa ke huī qadr mushk kī

achchhā rahā jo apne vatan se nikal gayā

misl-e-guhar hai aaj salātīñ pe us kī jā

jo bā-kamāl apne vatan se nikal gayā

yaad aaya sarv sā jo vo qad phuul sā ezaar

maiñ be-qarār ho ke chaman se nikal gayā

jo sher ham ne vasf-e-qad-e-yār meñ likhā

har misra apnā sarv-e-chaman se nikal gayā

us gul ko shauq phūloñ ke gahne kā jab huā

har gul usī havā meñ chaman se nikal gayā

'akbar' naqāb aaj uThā rū-e-yār se

shukr-e-ḳhudā ki chāñd gahan se nikal gayā

main nala-kash jo apne watan se nikal gaya

ek andalib tha ki chaman se nikal gaya

hoti nahin nabi ki bhi qadr apne shahr mein

allah ka habib watan se nikal gaya

tanhai bahr-e-ashiq-e-sadiq zarur hai

majnun isi liye to watan se nikal gaya

nafa se bahar aa ke hui qadr mushk ki

achchha raha jo apne watan se nikal gaya

misl-e-guhar hai aaj salatin pe us ki ja

jo ba-kamal apne watan se nikal gaya

yaad aaya sarw sa jo wo qad phul sa ezar

main be-qarar ho ke chaman se nikal gaya

jo sher hum ne wasf-e-qad-e-yar mein likha

har misra apna sarw-e-chaman se nikal gaya

us gul ko shauq phulon ke gahne ka jab hua

har gul usi hawa mein chaman se nikal gaya

'akbar' naqab aaj uTha ru-e-yar se

shukr-e-KHuda ki chand gahan se nikal gaya