main nalon ka apne asar chahta hun

maiñ nāloñ kā apne asar chāhtā huuñ

shab-e-hijr kī ab sahar chāhtā huuñ

ye lutf-o-karam aap ke ḳhuub lekin

mohabbat ba-rang-e-digar chāhtā huuñ

maiñ kyā chāhtā huuñ ye kyā pūchhte ho

maiñ duniyā meñ zer-o-zabar chāhtā huuñ

junūn-e-mohabbat kī ye intihā hai

ki tere hī dīvār-o-dar chāhtā huuñ

ye bāteñ tumhārī haiñ pur-lutf nāseh

ye qissa magar muḳhtasar chāhtā huuñ

bigāḌā hai 'manzar' ye zāhid ne kaisā

farishta ba-shakl-e-bashar chāhtā huuñ

main nalon ka apne asar chahta hun

shab-e-hijr ki ab sahar chahta hun

ye lutf-o-karam aap ke KHub lekin

mohabbat ba-rang-e-digar chahta hun

main kya chahta hun ye kya puchhte ho

main duniya mein zer-o-zabar chahta hun

junun-e-mohabbat ki ye intiha hai

ki tere hi diwar-o-dar chahta hun

ye baaten tumhaari hain pur-lutf naseh

ye qissa magar muKHtasar chahta hun

bigaDa hai 'manzar' ye zahid ne kaisa

farishta ba-shakl-e-bashar chahta hun