maine aaghosh-e-tasawwur mein tumhein kya dekha

maiñ ne āġhosh-e-tasavvur meñ tumheñ kyā dekhā

jugnū chamkā to maiñ samjhā yad-e-baizā dekhā

munkashif jab sabab-e-pursish-e-a.amāl huā

hashr ko jalva-gah-e-va.ada-e-fardā dekhā

maiñ ne har māh-e-do-hafta ko ba-vaqt-e-pīrī

jalva-e-sub.h meñ khoyā huā taarā dekhā

le kar añgḌā.ī uThī jab nigah-e-husn-e-talab

zarre zarre meñ unheñ anjuman-ārā dekhā

aaj bhī baiThe hue haiñ vo pas-e-parda-e-hashr

dekhā ai muntazir-e-va.ada-e-fardā dekhā

mere naale adab-āgāh-e-mohabbat na sahī

aap ne zaḳhm-e-jigar kyoñ ba-taqāzā dekhā

jab huā anjuman-e-gul meñ varūd-e-shabnam

murtasam dil pe tirā naqsh-e-kaf-e-pā dekhā

nabz par haath nazar sū-e-falak muhr-ba-lab

chārāgar ḳhair to hai kuchh to batā kyā dekhā

'faiz' kyā kyā dil amīñ-gāh-e-tasavvur na huā

maiñ ne jab pahlū-e-mahtāb meñ taarā dekhā

main ne aaghosh-e-tasawwur mein tumhein kya dekha

jugnu chamka to main samjha yad-e-baiza dekha

munkashif jab sabab-e-pursish-e-amal hua

hashr ko jalwa-gah-e-wada-e-farda dekha

main ne har mah-e-do-hafta ko ba-waqt-e-piri

jalwa-e-subh mein khoya hua tara dekha

le kar angDai uThi jab nigah-e-husn-e-talab

zarre zarre mein unhen anjuman-ara dekha

aaj bhi baiThe hue hain wo pas-e-parda-e-hashr

dekha ai muntazir-e-wada-e-farda dekha

mere nale adab-agah-e-mohabbat na sahi

aap ne zaKHm-e-jigar kyon ba-taqaza dekha

jab hua anjuman-e-gul mein warud-e-shabnam

murtasam dil pe tera naqsh-e-kaf-e-pa dekha

nabz par hath nazar su-e-falak muhr-ba-lab

chaaragar KHair to hai kuchh to bata kya dekha

'faiz' kya kya dil amin-gah-e-tasawwur na hua

main ne jab pahlu-e-mahtab mein tara dekha