maine ab samjha hai raaz-e-kaenat

maiñ ne ab samjhā hai rāz-e-kā.enāt

kar rahā huuñ ġham se ta.amīr-e-hayāt

kis tavaqqo par banā.ūñ āshiyāñ

zindagī hai aur barq-e-hādisāt

manzil-e-ġham is qadar āsāñ na thī

rah ga.e muñh dekh kar sabr-o-sabāt

jo mohabbat se rahā nā-āshnā

ho ke rah jaatā hai nang-e-kā.enāt

chhā rahī haiñ har taraf hairāniyāñ

aql hai begāna-e-rāz-e-hayāt

mere ruḳh par to na the ġham ke nishāñ

tum samajh lete ho shāyad dil kī baat

'hosh' kyā kiije hadīs-e-ġham bayāñ

kaun kah saktā hai dil kī vārdāt

main ne ab samjha hai raaz-e-kaenat

kar raha hun gham se tamir-e-hayat

kis tawaqqo par banaun aashiyan

zindagi hai aur barq-e-hadisat

manzil-e-gham is qadar aasan na thi

rah gae munh dekh kar sabr-o-sabaat

jo mohabbat se raha na-ashna

ho ke rah jata hai nang-e-kaenat

chha rahi hain har taraf hairaniyan

aql hai begana-e-raaz-e-hayat

mere ruKH par to na the gham ke nishan

tum samajh lete ho shayad dil ki baat

'hosh' kya kije hadis-e-gham bayan

kaun kah sakta hai dil ki wardat