maine ek umr guzari to uTha parda-e-KHwab

maiñ ne ik 'umr guzārī to uThā parda-e-ḳhvāb

aur vo 'umr hī kyā jis ko kaheñ ‘arsa-e-ḳhvāb

ḳhvāb-e-zarrīñ kī talab hai to zarā dhyān rahe

baa'z auqāt jalā detā hai ik sho'la-e-ḳhvāb

hujra-e-chashm meñ sab kuchh hai magar ḳhvāb nahīñ

kyā ḳhabar bhuul gayā huuñ maiñ kahāñ basta-e-ḳhvāb

tū rukā thā to mirā ḳhvāb-e-junūñ zard huā

tū chalā hai to bahut sabz huā sabza-e-ḳhvāb

ek lamha ki jahāñ rūh-o-badan mil jaa.eñ

kaash 'ushshāq ko mil jaa.e vo ik lamha-e-ḳhvāb

dil-e-dariyā meñ mire yaar use dekhte haiñ

aa.ine meñ nazar aa saktā nahīñ chehra-e-ḳhvāb

mujh ko Dar hai ki mire bhaa.ī mujhe maar na deñ

ai mire baap sunātā maiñ tujhe qissa-e-ḳhvāb

main ne ek 'umr guzari to uTha parda-e-KHwab

aur wo 'umr hi kya jis ko kahen ‘arsa-e-KHwab

KHwab-e-zarrin ki talab hai to zara dhyan rahe

ba'z auqat jala deta hai ek sho'la-e-KHwab

hujra-e-chashm mein sab kuchh hai magar KHwab nahin

kya KHabar bhul gaya hun main kahan basta-e-KHwab

tu ruka tha to mera KHwab-e-junun zard hua

tu chala hai to bahut sabz hua sabza-e-KHwab

ek lamha ki jahan ruh-o-badan mil jaen

kash 'ushshaq ko mil jae wo ek lamha-e-KHwab

dil-e-dariya mein mere yar use dekhte hain

aaine mein nazar aa sakta nahin chehra-e-KHwab

mujh ko Dar hai ki mere bhai mujhe mar na den

ai mere bap sunata main tujhe qissa-e-KHwab