maine junun mein kya kiya tujhko KHuda bana diya

maiñ ne junūñ meñ kyā kiyā tujh ko ḳhudā banā diyā

naam tirā jahāñ sunā sajde meñ sar jhukā diyā

sadma-e-ranj-o-ġham nahīñ tujh se ḳhizāñ gila nahīñ

shikva hai us bahār se jis ne chaman jalā diyā

mere liye zamīn bhī aur ye āsmān bhī

ziist ke is ahāta meñ tum ne mujhe phañsā diyā

shikve shikāyateñ kahīñ nāla-o-ashk-e-ġham kahīñ

maiñ ne vafā kī raah meñ apnā jo thā luTā diyā

dard se siina bhar uThā palkeñ bhī phir se nam huiiñ

phir se vo yaad aa gayā phir use bhulā diyā

shahr-e-vafā kī raah meñ ek charāġh-e-rāh thā

āñdhiyoñ ke itaab ne us ko bhī ab sikhā diyā

ab koī mudda'ā nahīñ himmat-e-iltijā nahīñ

duniyā ne mujh ko kyā diyā ḳhaak meñ milā diyā

kaafī nahīñ mirā gila shikva-e-dard ke liye

aa ke mazār par mire āñsuoñ se sajā diyā

main ne junun mein kya kiya tujh ko KHuda bana diya

nam tera jahan suna sajde mein sar jhuka diya

sadma-e-ranj-o-gham nahin tujh se KHizan gila nahin

shikwa hai us bahaar se jis ne chaman jala diya

mere liye zamin bhi aur ye aasman bhi

zist ke is ahata mein tum ne mujhe phansa diya

shikwe shikayaten kahin nala-o-ashk-e-gham kahin

main ne wafa ki rah mein apna jo tha luTa diya

dard se sina bhar uTha palken bhi phir se nam huin

phir se wo yaad aa gaya phir use bhula diya

shahr-e-wafa ki rah mein ek charagh-e-rah tha

aandhiyon ke itab ne us ko bhi ab sikha diya

ab koi mudda'a nahin himmat-e-iltija nahin

duniya ne mujh ko kya diya KHak mein mila diya

kafi nahin mera gila shikwa-e-dard ke liye

aa ke mazar par mere aansuon se saja diya