maine kab apni wafaon ka sila manga tha

maiñ ne kab apnī vafāoñ kā sila māñgā thā

ik tabassum hī tirā bahr-e-ḳhudā māñgā thā

kyā ḳhabar thī ki mirī nīñdeñ ujaḌ jā.eñgī

maiñ ne kho.e hue ḳhvāboñ kā patā māñgā thā

dast-e-gul-chīñ ne bhī gulshan se vahī phuul chunā

maiñ ne jis gul ke liye dast-e-sabā māñgā thā

shiddat-e-ġham meñ du'ā kī thī tujhe bhūlne kī

ab bhare zaḳhm to nādim huuñ ye kyā māñgā thā

bas isī baat pe barham hai zamāna mujh se

apne bad-ḳhvāhoñ kā bhī maiñ ne bhalā māñgā thā

ik guzārish bhī na ho paa.ī qubūl us ke huzūr

ġhāliban maiñ ne hī kuchh had se sivā māñgā thā

chūḌiyāñ TūTīñ to zaḳhmoñ se lahū-rang huī

jis hathelī ne zarā rañg-e-hinā māñgā thā

tū ne har ġham se navāzā hai tirā ḳhaas karam

mujh ko to ye bhī nahīñ yaad ki kyā māñgā thā

āfateñ sahne kā yaarā bhī to detā yaar ab

aur to kuchh bhī nahīñ us ke sivā māñgā thā

ye alag baat milā karb-e-musalsal varna

ham ne jo māñgā vo ba-sidq-o-safā māñgā thā

zehn par 'chāñd' phir ik barq sī lahrāne lagī

dil ne maazī ke nihāñ-ḳhānoñ se kyā māñgā thā

main ne kab apni wafaon ka sila manga tha

ek tabassum hi tera bahr-e-KHuda manga tha

kya KHabar thi ki meri ninden ujaD jaengi

main ne khoe hue KHwabon ka pata manga tha

dast-e-gul-chin ne bhi gulshan se wahi phul chuna

main ne jis gul ke liye dast-e-saba manga tha

shiddat-e-gham mein du'a ki thi tujhe bhulne ki

ab bhare zaKHm to nadim hun ye kya manga tha

bas isi baat pe barham hai zamana mujh se

apne bad-KHwahon ka bhi main ne bhala manga tha

ek guzarish bhi na ho pai qubul us ke huzur

ghaaliban main ne hi kuchh had se siwa manga tha

chuDiyan TuTin to zaKHmon se lahu-rang hui

jis hatheli ne zara rang-e-hina manga tha

tu ne har gham se nawaza hai tera KHas karam

mujh ko to ye bhi nahin yaad ki kya manga tha

aafaten sahne ka yara bhi to deta yar ab

aur to kuchh bhi nahin us ke siwa manga tha

ye alag baat mila karb-e-musalsal warna

hum ne jo manga wo ba-sidq-o-safa manga tha

zehn par 'chand' phir ek barq si lahrane lagi

dil ne mazi ke nihan-KHanon se kya manga tha