maine kal panw tere shahr mein kya rakkha tha

maiñ ne kal paañv tire shahr meñ kyā rakkhā thā

dil kī har mauj ne tūfān uThā rakkhā thā

log baḳhshish kī duā maañg rahe the jis shab

maiñ ne hoñToñ pe tirā naam sajā rakkhā thā

kashtiyāñ apnī thakan aaj utāreñ kaise

aaj sāhil ne bhī tūfān chhupā rakkhā thā

tū to dariyā hai mirī pyaas se kyā uljhegā

Thokaroñ meñ mirī kal karb-o-balā rakkhā thā

mere fan ne mujhe baḳhshī hai adab meñ shohrat

varna duniyā ne mirā naam dabā rakkhā thā

dhuup nafrat kī jaḌeñ kaaT rahī hai us kī

ham ne jo peḌ mohabbat kā lagā rakkhā thā

dil añdheroñ kā guzar kaise vahāñ ho jaatā

ham ne āñgan meñ charāġhoñ ko jalā rakkhā thā

main ne kal panw tere shahr mein kya rakkha tha

dil ki har mauj ne tufan uTha rakkha tha

log baKHshish ki dua mang rahe the jis shab

main ne honTon pe tera nam saja rakkha tha

kashtiyan apni thakan aaj utaren kaise

aaj sahil ne bhi tufan chhupa rakkha tha

tu to dariya hai meri pyas se kya uljhega

Thokaron mein meri kal karb-o-bala rakkha tha

mere fan ne mujhe baKHshi hai adab mein shohrat

warna duniya ne mera nam daba rakkha tha

dhup nafrat ki jaDen kaT rahi hai us ki

hum ne jo peD mohabbat ka laga rakkha tha

dil andheron ka guzar kaise wahan ho jata

hum ne aangan mein charaghon ko jala rakkha tha