maine kis shauq se ek umr ghazal-KHwani ki

maiñ ne kis shauq se ik umr ġhazal-ḳhvānī kī

kitnī gahrī haiñ lakīreñ merī peshānī kī

vaqt hai mere ta.āqub meñ chhupā le mujh ko

jū-e-kam-āb qasam tujh ko tire paanī kī

yuuñ guzartī hai rag o pai se tirī yaad kī lahar

jaise zanjīr chhanak uThtī hai zindānī kī

ajnabī se nazar aa.e tire chehre ke nuqūsh

jab tire husn pe maiñ ne nazar-e-sānī kī

mujh se kahtā hai koī aap pareshān na hoñ

mirī zulfoñ ko to aadat hai pareshānī kī

zindagī kyā hai tilismāt kī vaadī kā safar

phir bhī fursat nahīñ miltī mujhe hairānī kī

vo bhī the zikr bhī thā rañg-e-ġhazal kā 'shabnam'

phir to maiñ ne sar-e-mahfil vo gul-afshānī kī

main ne kis shauq se ek umr ghazal-KHwani ki

kitni gahri hain lakiren meri peshani ki

waqt hai mere taaqub mein chhupa le mujh ko

ju-e-kam-ab qasam tujh ko tere pani ki

yun guzarti hai rag o pai se teri yaad ki lahar

jaise zanjir chhanak uThti hai zindani ki

ajnabi se nazar aae tere chehre ke nuqush

jab tere husn pe main ne nazar-e-sani ki

mujh se kahta hai koi aap pareshan na hon

meri zulfon ko to aadat hai pareshani ki

zindagi kya hai tilismat ki wadi ka safar

phir bhi fursat nahin milti mujhe hairani ki

wo bhi the zikr bhi tha rang-e-ghazal ka 'shabnam'

phir to main ne sar-e-mahfil wo gul-afshani ki