میں نے لکھی لہو سے تو تحریر بول اٹھی

میں نے لکھی لہو سے تو تحریر بول اٹھی

ہر قتل بے قصور کی تفسیر بول اٹھی

زنداں میں تو میں مہر بہ لب ہی رہا مگر

جھنکار بن کے پاؤں کی زنجیر بول اٹھی

پوچھا کہ قتل و خون یہ ہے کس نظر کا شوق

تن کر نگاہ وقت کی شمشیر بول اٹھی

بے کار ہے طلب جو خلوص طلب نہ ہو

اٹھے دعا کو ہاتھ تو تاثیر بول اٹھی

آئینہ دیکھتے ہوئے جب بھی خیال میں

میں چپ رہا تو آپ کی تصویر بول اٹھی

جاگے شعور و فکر تو ویران زیست میں

تدبیر کامیاب کی تقدیر بول اٹھی

اکثر یہی ہوا ہے کہ جب عرض شوق میں

عجلت نہ ہو سکی ہے تو تاخیر بول اٹھی

وہ راز جس کو کہہ نہ سکی شرم سے زبان

ان کے حنائی ہاتھ کی تحریر بول اٹھی

تھی صبح نو اس آگ پہ گم صم مگر کلیمؔ

ہر ایک جلتے خواب کی تعبیر بول اٹھی