maine pai nahin jine ki saza kaun se din

maiñ ne paa.ī nahīñ jiine kī sazā kaun se din

mujh ko aaya nahīñ marne kā mazā kaun se din

raas aa.ī mujhe furqat kī havā kaun se din

maiñ ne māñgī nahīñ marne kī du'ā kaun se din

kab harī hogī tamannāoñ kī khetī yā-rab

chhā.egī jhuum ke rahmat kī ghaTā kaun se din

hai yahī vaqt karam kā ki huuñ ḳhud se bezār

kaam aa.egī tirī shān-e-atā kaun se din

kis liye toḌ diyā aasrā tum ne dil kā

maiñ ne chāhā thā vafāoñ kā sila kaun se din

ā.eñge jab mire pahlū meñ vo sharmā.e hue

vo ghaḌī aa.egī ai mere ḳhudā kaun se din

maiñ to tayyār huuñ miTne ko tum āvāz to do

āzmāoge tum ab merī vafā kaun se din

mujh ko khichvā.egī kab daar pe vahshat 'sāhir'

pā.ūñgā apnī mohabbat kā sila kaun se din

main ne pai nahin jine ki saza kaun se din

mujh ko aaya nahin marne ka maza kaun se din

ras aai mujhe furqat ki hawa kaun se din

main ne mangi nahin marne ki du'a kaun se din

kab hari hogi tamannaon ki kheti ya-rab

chhaegi jhum ke rahmat ki ghaTa kaun se din

hai yahi waqt karam ka ki hun KHud se bezar

kaam aaegi teri shan-e-ata kaun se din

kis liye toD diya aasra tum ne dil ka

main ne chaha tha wafaon ka sila kaun se din

aaenge jab mere pahlu mein wo sharmae hue

wo ghaDi aaegi ai mere KHuda kaun se din

main to tayyar hun miTne ko tum aawaz to do

aazmaoge tum ab meri wafa kaun se din

mujh ko khichwaegi kab dar pe wahshat 'sahir'

paunga apni mohabbat ka sila kaun se din