maine socha hai ki ab tark-e-tamanna kar lun

maiñ ne sochā hai ki ab tark-e-tamannā kar luuñ

zindagī jaise guzartī hai gavārā kar luuñ

laakh tūfān uTheñ laakh kināre Dūbeñ

apnī TuuTī huī kashtī pe bharosā kar luuñ

havas-e-shauq na taḌpā.e nigāh-o-dil ko

terī duniyā se bahut duur baserā kar luuñ

bujhte jaate haiñ sar-e-shām umīdoñ ke charāġh

kis kī yādoñ se dil-o-jāñ meñ ujālā kar luuñ

kaun mere liye tanvīr liye aa.egā

kis bharose pe sar-e-shām añdherā kar luuñ

apnī vīrāni-e-dil dekh ke jī chāhtā hai

terī bātoñ tirī nazroñ pe bharosā kar luuñ

main ne socha hai ki ab tark-e-tamanna kar lun

zindagi jaise guzarti hai gawara kar lun

lakh tufan uThen lakh kinare Duben

apni TuTi hui kashti pe bharosa kar lun

hawas-e-shauq na taDpae nigah-o-dil ko

teri duniya se bahut dur basera kar lun

bujhte jate hain sar-e-sham umidon ke charagh

kis ki yaadon se dil-o-jaan mein ujala kar lun

kaun mere liye tanwir liye aaega

kis bharose pe sar-e-sham andhera kar lun

apni virani-e-dil dekh ke ji chahta hai

teri baaton teri nazron pe bharosa kar lun