maine teri basti ke ye dekhe hain nazare

maiñ ne tirī bastī ke ye dekhe haiñ nazāre

mahuve ke daraḳhtoñ se Tapakte haiñ sitāre

rahne de isī tarh falak ke ye nazāre

dāman pe chhiTak yuuñ ki bikhar jaa.eñ sitāre

maujoñ kī ravānī meñ tujhe dekh rahā huuñ

baiThā huuñ baḌī der se dariyā ke kināre

baḌh jā.egī do chaar baras aur mirī 'umr

do chaar ghaḌī tū jo mire saath guzāre

tum kaise sapere ho na mantar hai na tiryāq

jholī meñ liye phirte ho sāñpoñ ke piTāre

ham toḌ chuke haiñ jise be-kār samajh kar

dīvār khaḌī thī unhīñ īñToñ ke sahāre

itnā to batānā ki namāzī bhī koī hai

ūñche haiñ tire gaañv kī masjid ke manāre

allāh bhī razzāq hai banda bhī saḳhī hai

mar jaate haiñ 'irfān' bahut bhuuk ke maare

main ne teri basti ke ye dekhe hain nazare

mahuwe ke daraKHton se Tapakte hain sitare

rahne de isi tarh falak ke ye nazare

daman pe chhiTak yun ki bikhar jaen sitare

maujon ki rawani mein tujhe dekh raha hun

baiTha hun baDi der se dariya ke kinare

baDh jaegi do chaar baras aur meri 'umr

do chaar ghaDi tu jo mere sath guzare

tum kaise sapere ho na mantar hai na tiryaq

jholi mein liye phirte ho sanpon ke piTare

hum toD chuke hain jise be-kar samajh kar

diwar khaDi thi unhin inTon ke sahaare

itna to batana ki namazi bhi koi hai

unche hain tere ganw ki masjid ke manare

allah bhi razzaq hai banda bhi saKHi hai

mar jate hain 'irfan' bahut bhuk ke mare