maine ye jab suna to mera dil dahal gaya

maiñ ne ye jab sunā to mirā dil dahal gayā

sūraj kā jism aag kī lapToñ se jal gayā

mausam ne aisī aag lagā.ī thī raat meñ

mere badan meñ ḳhuun thā jitnā ubal gayā

sūkhe laboñ kī pyaas bujhāne ke vāste

kal raat chāñd barf kī sūrat pighal gayā

manzar ajab ye dekh ke hairat-zada haiñ phuul

shabnam kā paañv dhuup kī shiddat se jal gayā

ta.abīr kī hatheliyāñ piilī na ho sakīñ

ik ḳhauf mere ḳhvāb ke sar ko kuchal gayā

parchhā.iyoñ ne aks ke kapḌe pahan liye

ā.īna jab se sañg ke paikar meñ Dhal gayā

kaise batā.eñ tujh ko ki terī talāsh meñ

saaya hamāre jism kā paidal nikal gayā

hoñToñ se tere lafzoñ ke bādal baras ga.e

ḳhāmoshiyoñ kā dasht-e-sukūñ thā jo jal gayā

jalte hue charāġh pe juuñ hī nazar paḌī

kuchh sar-phirī havāoñ kā lahja badal gayā

main ne ye jab suna to mera dil dahal gaya

suraj ka jism aag ki lapTon se jal gaya

mausam ne aisi aag lagai thi raat mein

mere badan mein KHun tha jitna ubal gaya

sukhe labon ki pyas bujhane ke waste

kal raat chand barf ki surat pighal gaya

manzar ajab ye dekh ke hairat-zada hain phul

shabnam ka panw dhup ki shiddat se jal gaya

tabir ki hatheliyan pili na ho sakin

ek KHauf mere KHwab ke sar ko kuchal gaya

parchhaiyon ne aks ke kapDe pahan liye

aaina jab se sang ke paikar mein Dhal gaya

kaise bataen tujh ko ki teri talash mein

saya hamare jism ka paidal nikal gaya

honTon se tere lafzon ke baadal baras gae

KHamoshiyon ka dasht-e-sukun tha jo jal gaya

jalte hue charagh pe jun hi nazar paDi

kuchh sar-phiri hawaon ka lahja badal gaya