main sach mein dekh ke aaya hun kaenat ki had

maiñ sach meñ dekh ke aayā huuñ kā.enāt kī had

nazar kahīñ bhī nahīñ aa.ī mujh ko raat kī had

ye aarzū mirī har had ke paar jā chukī hai

ki paar kar luuñ kabhī to maiñ apnī zaat kī had

na bhuuk kī na havas kī na rā.egānī kī

qubūl hī nahīñ ham ko kisī bhī baat kī had

yahī sabab hai ki ḳhāmoshī mujh ko bhātī hai

is ik zabāñ meñ nahīñ hai kahīñ luġhāt kī had

hayāt kī to hadeñ tai-shuda hī hotī haiñ

samā sakegī kahāñ in meñ ḳhvāhishāt kī had

ġharaz ki ham haiñ jahāñ ye hai shāhkār terā

to ye jahān hai tere taḳhaiyyulāt kī had

phir is ke baa'd ke ash'ār hashv lagte haiñ

'anant' is liye rakhte haiñ pāñch saat kī had

main sach mein dekh ke aaya hun kaenat ki had

nazar kahin bhi nahin aai mujh ko raat ki had

ye aarzu meri har had ke par ja chuki hai

ki par kar lun kabhi to main apni zat ki had

na bhuk ki na hawas ki na raegani ki

qubul hi nahin hum ko kisi bhi baat ki had

yahi sabab hai ki KHamoshi mujh ko bhati hai

is ek zaban mein nahin hai kahin lughat ki had

hayat ki to haden tai-shuda hi hoti hain

sama sakegi kahan in mein KHwahishat ki had

gharaz ki hum hain jahan ye hai shahkar tera

to ye jahan hai tere taKHaiyyulat ki had

phir is ke ba'd ke ash'ar hashw lagte hain

'anant' is liye rakhte hain panch sat ki had