main samajhta tha dar-o-baam kahan bolte hain

maiñ samajhtā thā dar-o-bām kahāñ bolte haiñ

phir tire baa'd khulā mujh pe ki haañ bolte haiñ

ye jo dabtī hai mire shor meñ āvāz mirī

merī hastī meñ kahīñ kār-e-ziyāñ bolte haiñ

is jahāñ ke mutavāzī bhī jahāñ hai koī

jo yahāñ bol nahīñ paate vahāñ bolte haiñ

muttasil us ke laboñ se hai ye kār-e-āvāz

vo agar hil na sakeñ ham bhī kahāñ bolte haiñ

ik zamāne ko bayāñ karte haiñ lafzoñ ke baġhair

mujh suḳhan-sāz se behtar to nishāñ bolte haiñ

dekh ik duuje se Takrāne lagīñ āvāzeñ

itnā be-Dhañg tire log yahāñ bolte haiñ

ik ḳhalā hai jo sadāoñ ko nigal jaatā hai

koī sun hī nahīñ paatā jo makāñ bolte haiñ

aag rotī hai to ham ko bhī rulā detī hai

ye to aañsū haiñ jinheñ log dhuāñ bolte haiñ

ashk dar ashk salāsat hai bahāo meñ 'aqīl'

mirī āñkhoñ ko tabhī chashm-e-ravāñ bolte haiñ

main samajhta tha dar-o-baam kahan bolte hain

phir tere ba'd khula mujh pe ki han bolte hain

ye jo dabti hai mere shor mein aawaz meri

meri hasti mein kahin kar-e-ziyan bolte hain

is jahan ke mutawazi bhi jahan hai koi

jo yahan bol nahin pate wahan bolte hain

muttasil us ke labon se hai ye kar-e-awaz

wo agar hil na saken hum bhi kahan bolte hain

ek zamane ko bayan karte hain lafzon ke baghair

mujh suKHan-saz se behtar to nishan bolte hain

dekh ek duje se Takrane lagin aawazen

itna be-Dhang tere log yahan bolte hain

ek KHala hai jo sadaon ko nigal jata hai

koi sun hi nahin pata jo makan bolte hain

aag roti hai to hum ko bhi rula deti hai

ye to aansu hain jinhen log dhuan bolte hain

ashk dar ashk salasat hai bahao mein 'aqil'

meri aankhon ko tabhi chashm-e-rawan bolte hain