main samjha tha zara sa muKHtalif hai

maiñ samjhā thā zarā sā muḳhtalif hai

magar vo achchhā ḳhāsā muḳhtalif hai

mujhī se hī shikāyat kis liye hai

tirā bhī to ravayya muḳhtalif hai

batānā hī paḌā āḳhir ye us ko

jo hotā hai vo lagtā muḳhtalif hai

bichhaḌte vaqt us ne ye kahā thā

tirā mujh se qabīla muḳhtalif hai

kabhī aa mil ke dekheñ aa.ine meñ

khulegā ham meñ kyā kyā muḳhtalif hai

mirā tum se ta.alluq muḳhtalif thā

magar logoñ ne samjhā muḳhtalif hai

mirā honā na honā hai barābar

tirā honā na honā muḳhtalif hai

jo logoñ ne batāyā sab ġhalat thā

tirā yaksar sarāpā muḳhtalif hai

jo us kī chāhateñ haiñ aarzī haiñ

magar merā irāda muḳhtalif hai

'saġhīr' us kī haiñ āñkheñ bhī ġhazab kī

aur us par ye ki hañstā muḳhtalif hai

main samjha tha zara sa muKHtalif hai

magar wo achchha KHasa muKHtalif hai

mujhi se hi shikayat kis liye hai

tera bhi to rawayya muKHtalif hai

batana hi paDa aaKHir ye us ko

jo hota hai wo lagta muKHtalif hai

bichhaDte waqt us ne ye kaha tha

tera mujh se qabila muKHtalif hai

kabhi aa mil ke dekhen aaine mein

khulega hum mein kya kya muKHtalif hai

mera tum se talluq muKHtalif tha

magar logon ne samjha muKHtalif hai

mera hona na hona hai barabar

tera hona na hona muKHtalif hai

jo logon ne bataya sab ghalat tha

tera yaksar sarapa muKHtalif hai

jo us ki chahaten hain aarzi hain

magar mera irada muKHtalif hai

'saghir' us ki hain aankhen bhi ghazab ki

aur us par ye ki hansta muKHtalif hai