main shayad khelne khane laga hun

maiñ shāyad khelne khāne lagā huuñ

ye lutf-e-zīst jo paane lagā huuñ

maiñ rasm-o-rāh-o-andāz-e-vafā ko

koī ā.īna dikhlāne lagā huuñ

haqīqat kuchh nahīñ duniyā jahāñ kī

haqīqat ḳhud ko samjhāne lagā huuñ

abhī haiñ marhale ḳhushiyoñ ke baaqī

ye kah kar dil ko bahlāne lagā huuñ

gurezāñ ashk barsāne se āñkheñ

magar maiñ ḳhuun barsāne lagā huuñ

abhī mañjdhār meñ utrī na nayyā

abhī lahroñ se ghabrāne lagā huuñ

na suljhā mujh se koī ek lamha

tanāb-e-zīst suljhāne lagā huuñ

bhalā ho zindagī ke hādsoñ kā

'ajab lutf-e-qazā paane lagā huuñ

lagā kar maut ko siine se apne

mujhe lagtā hai ghar jaane lagā huuñ

mubārak raunaqeñ duniyā kī tum ko

ḳhudā-hāfiz ki maiñ jaane lagā huuñ

vo jis ne zaḳhm-e-dil behtar diye haiñ

usī ke zaḳhm sahlāne lagā huuñ

burā ho raushnī terī anā kā

siyāhī se bhī ghabrāne lagā huuñ

baḌā uubā huā huuñ sarḳhushī se

'ḳhayāl' ab ġham ke sir.hāne lagā huuñ

main shayad khelne khane laga hun

ye lutf-e-zist jo pane laga hun

main rasm-o-rah-o-andaz-e-wafa ko

koi aaina dikhlane laga hun

haqiqat kuchh nahin duniya jahan ki

haqiqat KHud ko samjhane laga hun

abhi hain marhale KHushiyon ke baqi

ye kah kar dil ko bahlane laga hun

gurezan ashk barsane se aankhen

magar main KHun barsane laga hun

abhi manjdhaar mein utri na nayya

abhi lahron se ghabrane laga hun

na suljha mujh se koi ek lamha

tanab-e-zist suljhane laga hun

bhala ho zindagi ke hadson ka

'ajab lutf-e-qaza pane laga hun

laga kar maut ko sine se apne

mujhe lagta hai ghar jaane laga hun

mubarak raunaqen duniya ki tum ko

KHuda-hafiz ki main jaane laga hun

wo jis ne zaKHm-e-dil behtar diye hain

usi ke zaKHm sahlane laga hun

bura ho raushni teri ana ka

siyahi se bhi ghabrane laga hun

baDa uba hua hun sarKHushi se

'KHayal' ab gham ke sirhane laga hun