main shahri hun magar meri bayabani nahin jati

maiñ shahrī huuñ magar merī bayābānī nahīñ jaatī

junūñ kuchh bhī pahan le us kī uryānī nahīñ jaatī

nahīñ kuchh aur hogā vo mohabbat to nahīñ hogī

ki itnī raushnī itnī ba-āsānī nahīñ jaatī

khule haiñ saare darvāze hamāre qaid-ḳhāne ke

ki darvāze talak zanjīr-e-zindānī nahīñ jaatī

butoñ ko dekhte hī huuk sī ik dil meñ uThtī hai

dil-e-momin se yād-e-kufr-sāmānī nahīñ jaatī

uThā laatā huuñ maiñ bāzār se roz ik na.ī aafat

mire ghar se balā-e-sāz-o-sāmānī nahīñ jaatī

azal kā dāġh-e-hijr itnā hamāre dil pe raushan hai

ki apnī vasl kī arzī kahīñ maanī nahīñ jaatī

maiñ kab kā us kī hadd-e-dīd se bāhar nikal aayā

magar us kī taraf se merī nigarānī nahīñ jaatī

tamām a.asāb par taarī hai nasrī nazm duniyā kī

magar 'ehsās'-sāhab kī ġhazal-ḳhvānī nahīñ jaatī

main shahri hun magar meri bayabani nahin jati

junun kuchh bhi pahan le us ki uryani nahin jati

nahin kuchh aur hoga wo mohabbat to nahin hogi

ki itni raushni itni ba-asani nahin jati

khule hain sare darwaze hamare qaid-KHane ke

ki darwaze talak zanjir-e-zindani nahin jati

buton ko dekhte hi huk si ek dil mein uThti hai

dil-e-momin se yaad-e-kufr-samani nahin jati

uTha lata hun main bazar se roz ek nai aafat

mere ghar se bala-e-saz-o-samani nahin jati

azal ka dagh-e-hijr itna hamare dil pe raushan hai

ki apni wasl ki arzi kahin mani nahin jati

main kab ka us ki hadd-e-did se bahar nikal aaya

magar us ki taraf se meri nigarani nahin jati

tamam aasab par tari hai nasri nazm duniya ki

magar 'ehsas'-sahab ki ghazal-KHwani nahin jati