main sochta tha ki dega mujhe ujale kaun

maiñ sochtā thā ki degā mujhe ujāle kaun

ye kar gayā mah-o-anjum mire havāle kaun

nayā jarīda-e-sher-o-adab nikāle kaun

yahāñ ḳharīd ke paḌhtā hai ḳhud risāle kaun

chahār-samt muñDeroñ pe zaaġh baiThe haiñ

na jaane chhīn le ma.asūm ke nivāle kaun

pilā ke ḳhūn-e-jigar dostoñ ko dekh liyā

ab aur dushman-e-jāñ āstīñ meñ paale kaun

pasīna bech rahā huuñ lahū bhī arzāñ hai

ḳharīdtā hai kaf-e-ḳhūñfishāñ ke chhāle kaun

hazār tarah kī zehnī aziyyateñ de kar

pilā rahā hai mujhe zahr ke pyāle kaun

lagī ho niiñd to yāroñ ko hoshiyār kareñ

ye murda log haiñ murdoñ meñ jaan Daale kaun

ye rang-o-nasl kī tafrīq ham ne ḳhud kī hai

vagarna ek haiñ sab gore kaun kaale kaun

kisī purāne khañDar meñ ye lāsheñ dafnā do

havā ḳhilāf hai nezoñ pe sar uchhāle kaun

main sochta tha ki dega mujhe ujale kaun

ye kar gaya mah-o-anjum mere hawale kaun

naya jarida-e-sher-o-adab nikale kaun

yahan KHarid ke paDhta hai KHud risale kaun

chahaar-samt munDeron pe zagh baiThe hain

na jaane chhin le masum ke niwale kaun

pila ke KHun-e-jigar doston ko dekh liya

ab aur dushman-e-jaan aastin mein pale kaun

pasina bech raha hun lahu bhi arzan hai

KHaridta hai kaf-e-KHunfishan ke chhaale kaun

hazar tarah ki zehni aziyyaten de kar

pila raha hai mujhe zahr ke pyale kaun

lagi ho nind to yaron ko hoshiyar karen

ye murda log hain murdon mein jaan Dale kaun

ye rang-o-nasl ki tafriq hum ne KHud ki hai

wagarna ek hain sab gore kaun kale kaun

kisi purane khanDar mein ye lashen dafna do

hawa KHilaf hai nezon pe sar uchhaale kaun