main sozish-e-gham-e-dauran se yun jala KHamosh

maiñ sozish-e-ġham-e-daurāñ se yuuñ jalā ḳhāmosh

ki jaise bazm meñ jaltā ho ik diyā ḳhāmosh

ye aur baat ki hoñToñ pe lafz bikhre the

magar thā bolne vāloñ kā mudda'ā ḳhāmosh

abhī na chheḌiye ḳhvābīda mausamoñ kā mizāj

abhī hai raat ke āñchal meñ har fazā ḳhāmosh

mirī sarisht meñ ḳhāmoshiyoñ kā zahr na ghol

na rah sakegā mirā zauq-e-haq-navā ḳhāmosh

badan kī qaid meñ chīḳheñ na ghuT ke mar jaa.eñ

sisakte karb ko kyuuñ tum ne kar diyā ḳhāmosh

lahaktī aañkh dhaḌakte diloñ ke paas na lā

guzar na jaa.e kahīñ koī hadisā ḳhāmosh

har ek samt hai bikhrā huā sukūt 'āzar'

idhar haiñ devtā patthar udhar ḳhudā ḳhāmosh

main sozish-e-gham-e-dauran se yun jala KHamosh

ki jaise bazm mein jalta ho ek diya KHamosh

ye aur baat ki honTon pe lafz bikhre the

magar tha bolne walon ka mudda'a KHamosh

abhi na chheDiye KHwabida mausamon ka mizaj

abhi hai raat ke aanchal mein har faza KHamosh

meri sarisht mein KHamoshiyon ka zahr na ghol

na rah sakega mera zauq-e-haq-nawa KHamosh

badan ki qaid mein chiKHen na ghuT ke mar jaen

sisakte karb ko kyun tum ne kar diya KHamosh

lahakti aankh dhaDakte dilon ke pas na la

guzar na jae kahin koi hadisa KHamosh

har ek samt hai bikhra hua sukut 'azar'

idhar hain dewta patthar udhar KHuda KHamosh