main tasht-e-KHwab liye hath mein guzar gai hun

maiñ tasht-e-ḳhvāb liye haath meñ guzar ga.ī huuñ

samajh sakā na vo jis ke liye maiñ ghar ga.ī huuñ

bahut ajab thī samundar se guftugū lekin

pahan ke pyaas palaTne kā sabr kar ga.ī huuñ

mirā mizāj rahā dasht-āshnā shab bhar

ki din meñ bastiyāñ dekhīñ to jaise Dar ga.ī huuñ

husūl-e-ḳhvāhish-e-nāyāb garche nā-mumkin

kisī ke va.ada-e-be-āb pe Thahar ga.ī huuñ

bahut nihāl hai dil aañkh meñ hai sarmastī

lage ki shahar-e-ḳhush-anjām se guzar ga.ī huuñ

balā se bhuul ga.e vo jo āshnā the kabhī

maiñ aaj apne shabistāñ meñ be-ḳhatar ga.ī huuñ

ḳhushā hathelī pe yādoñ kā qāfila Thahrā

ḳhushā ki yaad thī aisī ḳhushī se mar ga.ī huuñ

bahut aziiz thā āshuftagī kā pairāhan

ye jaan kar dam-e-āzurdagī bikhar ga.ī huuñ

sarāb-āsā rahā vo ta.alluq-e-ḳhūbāñ

palaT palaT ke bulātā hai phir bhī Dar ga.ī huuñ

main tasht-e-KHwab liye hath mein guzar gai hun

samajh saka na wo jis ke liye main ghar gai hun

bahut ajab thi samundar se guftugu lekin

pahan ke pyas palaTne ka sabr kar gai hun

mera mizaj raha dasht-ashna shab bhar

ki din mein bastiyan dekhin to jaise Dar gai hun

husul-e-KHwahish-e-nayab garche na-mumkin

kisi ke wada-e-be-ab pe Thahar gai hun

bahut nihaal hai dil aankh mein hai sarmasti

lage ki shahar-e-KHush-anjam se guzar gai hun

bala se bhul gae wo jo aashna the kabhi

main aaj apne shabistan mein be-KHatar gai hun

KHusha hatheli pe yaadon ka qafila Thahra

KHusha ki yaad thi aisi KHushi se mar gai hun

bahut aziz tha aashuftagi ka pairahan

ye jaan kar dam-e-azurdagi bikhar gai hun

sarab-asa raha wo talluq-e-KHuban

palaT palaT ke bulata hai phir bhi Dar gai hun