main tere hijr-zada mausamon ki zad mein hun

maiñ tere hijr-zada mausamoñ kī zad meñ huuñ

pas-e-ḳhayāl tirī qurbatoñ kī had meñ huuñ

maiñ chāhtī huuñ ujālā mirī zamīñ par ho

maiñ ik diyā huuñ magar raushnī kī mad meñ huuñ

ye nasl-e-nau mire lahje se muttafiq kab hai

maiñ ik savāl huuñ lekin qubūl-o-rad meñ huuñ

kashāñ kashāñ liye phirtī hai justujū koī

ḳhabar nahīñ ki junūñ meñ huuñ yā ḳhirad meñ huuñ

mirā hunar mirā apnā hai musta.ār nahīñ

maiñ jis qadar bhī jahāñ bhī huuñ apne qad meñ huuñ

kudūrateñ haiñ yahāñ nafrat-o-adāvat hai

magar maiñ phir bhī yahāñ fikr-e-nek-o-bad meñ huuñ

vo dostī meñ 'ġhazal' had se gir ga.e lekin

maiñ dushmanī ko nibhā kar bhī apnī had meñ huuñ

main tere hijr-zada mausamon ki zad mein hun

pas-e-KHayal teri qurbaton ki had mein hun

main chahti hun ujala meri zamin par ho

main ek diya hun magar raushni ki mad mein hun

ye nasl-e-nau mere lahje se muttafiq kab hai

main ek sawal hun lekin qubul-o-rad mein hun

kashan kashan liye phirti hai justuju koi

KHabar nahin ki junun mein hun ya KHirad mein hun

mera hunar mera apna hai mustaar nahin

main jis qadar bhi jahan bhi hun apne qad mein hun

kuduraten hain yahan nafrat-o-adawat hai

magar main phir bhi yahan fikr-e-nek-o-bad mein hun

wo dosti mein 'ghazal' had se gir gae lekin

main dushmani ko nibha kar bhi apni had mein hun