main teri aankh mein ye kya talash karta hun

maiñ terī aañkh meñ ye kyā talāsh kartā huuñ

bhañvar ke biich kināra talāsh kartā huuñ

maiñ ik sukūn kā lamha talāsh kartā huuñ

udāsiyoñ meñ bhī rasta talāsh kartā huuñ

jo merī aañkh se ojhal kabhī nahīñ hotā

use maiñ sab se ziyāda talāsh kartā huuñ

isī liye to kabhī DhūñD hī nahīñ paayā

har ek shaḳhs meñ ḳhud sā talāsh kartā huuñ

jo mere haath se bachpan meñ kho gayā thā miyāñ

maiñ aaj bhī vahī basta talāsh kartā huuñ

bichhaḌne lagtā hai koī zarā zarā kar ke

phir us ko saare kā saarā talāsh kartā huuñ

talāsh karte hue bhuul jaatā huuñ ḳhud ko

kabhī kabhī tujhe itnā talāsh kartā huuñ

yahīñ kahīñ kabhī baiThā huā thā maiñ 'tābish'

so tai kiyā ki dobāra talāsh kartā huuñ

main teri aankh mein ye kya talash karta hun

bhanwar ke bich kinara talash karta hun

main ek sukun ka lamha talash karta hun

udasiyon mein bhi rasta talash karta hun

jo meri aankh se ojhal kabhi nahin hota

use main sab se ziyaada talash karta hun

isi liye to kabhi DhunD hi nahin paya

har ek shaKHs mein KHud sa talash karta hun

jo mere hath se bachpan mein kho gaya tha miyan

main aaj bhi wahi basta talash karta hun

bichhaDne lagta hai koi zara zara kar ke

phir us ko sare ka sara talash karta hun

talash karte hue bhul jata hun KHud ko

kabhi kabhi tujhe itna talash karta hun

yahin kahin kabhi baiTha hua tha main 'tabish'

so tai kiya ki dobara talash karta hun