main teri dushmani ko bhul gaya

maiñ tirī dushmanī ko bhuul gayā

aur tū dostī ko bhuul gayā

jab se kāñTe chune haiñ dāman meñ

phuul kī tāzgī ko bhuul gayā

is qadar zulmatoñ ne gherā hai

ishrat-e-raushnī ko bhuul gayā

jab achānak nazar paḌī is par

ḳhud ko maiñ do ghaḌī ko bhuul gayā

ḳhud-pasandī ke is zamāne meñ

aadmī aadmī ko bhuul gayā

hosh apnā bhī ab kahāñ mujh ko

har sitam har ḳhushī ko bhuul gayā

pī ke niklā jo mai-kade se maiñ

har ġham-e-zindagī ko bhuul gayā

main teri dushmani ko bhul gaya

aur tu dosti ko bhul gaya

jab se kanTe chune hain daman mein

phul ki tazgi ko bhul gaya

is qadar zulmaton ne ghera hai

ishrat-e-raushni ko bhul gaya

jab achanak nazar paDi is par

KHud ko main do ghaDi ko bhul gaya

KHud-pasandi ke is zamane mein

aadmi aadmi ko bhul gaya

hosh apna bhi ab kahan mujh ko

har sitam har KHushi ko bhul gaya

pi ke nikla jo mai-kade se main

har gham-e-zindagi ko bhul gaya