main to chup tha magar usne bhi sunane na diya

maiñ to chup thā magar us ne bhī sunāne na diyā

ġham-e-duniyā kā koī zikr tak aane na diyā

us kā zahrāba-e-paikar hai mirī rag rag meñ

us kī yādoñ ne magar haath lagāne na diyā

us ne duurī kī bhī had khīñch rakhī hai goyā

kuchh ḳhayālāt se aage mujhe jaane na diyā

bādbāñ apne safīne kā zarā sī lete

vaqt itnā bhī zamāne kī havā ne na diyā

vahī in.aam zamāne se jise milnā thā

log ma.asūm haiñ kahte haiñ ḳhudā ne na diyā

koī fariyād kare guuñj mire dil se uThe

mauqa-e-dard kabhī haath se jaane na diyā

'shāz' ik dard se sau dard ke rishte nikle

kin masā.ib ne use jī se bhulāne na diyā

main to chup tha magar us ne bhi sunane na diya

gham-e-duniya ka koi zikr tak aane na diya

us ka zahraba-e-paikar hai meri rag rag mein

us ki yaadon ne magar hath lagane na diya

us ne duri ki bhi had khinch rakhi hai goya

kuchh KHayalat se aage mujhe jaane na diya

baadban apne safine ka zara si lete

waqt itna bhi zamane ki hawa ne na diya

wahi inam zamane se jise milna tha

log masum hain kahte hain KHuda ne na diya

koi fariyaad kare gunj mere dil se uThe

mauqa-e-dard kabhi hath se jaane na diya

'shaz' ek dard se sau dard ke rishte nikle

kin masaib ne use ji se bhulane na diya