main to kahunga barmala ek diya bujha hua

maiñ to kahūñgā barmalā ek diyā bujhā huā

ishq na ho to ziist kyā ek diyā bujhā huā

aap ke saath bazm kī raunaqeñ sab chalī ga.iiñ

sub.h-e-firāq rah gayā ek diyā bujhā huā

paik-e-ḳhayāl daf.atan pahūñchā harīm-e-nāz meñ

aap hī aap jal uThā ek diyā bujhā huā

ahl-e-havas ne jā-ba-jā kitne diye bujhā diye

koī kahīñ jalā sakā ek diyā bujhā huā

jis meñ koī lagan na ho jis meñ koī taḌap na ho

aadmī us mizāj kā ek diyā bujhā huā

bazm-e-tarab kī yādgār raunaq-e-shab kī yādgār

ek hai sāz-e-be-sadā ek diyā bujhā huā

aḳhtar-e-sub.h kī qasam maiñ bhī huuñ sub.h kā naqīb

ek diyā jalā huā ek diyā bujhā huā

mahfil-e-zīst meñ bahut māh-o-nujūm zau-fishāñ

in meñ mirā shumār kyā ek diyā bujhā huā

main to kahunga barmala ek diya bujha hua

ishq na ho to zist kya ek diya bujha hua

aap ke sath bazm ki raunaqen sab chali gain

subh-e-firaq rah gaya ek diya bujha hua

paik-e-KHayal dafatan pahuncha harim-e-naz mein

aap hi aap jal uTha ek diya bujha hua

ahl-e-hawas ne ja-ba-ja kitne diye bujha diye

koi kahin jala saka ek diya bujha hua

jis mein koi lagan na ho jis mein koi taDap na ho

aadmi us mizaj ka ek diya bujha hua

bazm-e-tarab ki yaadgar raunaq-e-shab ki yaadgar

ek hai saz-e-be-sada ek diya bujha hua

aKHtar-e-subh ki qasam main bhi hun subh ka naqib

ek diya jala hua ek diya bujha hua

mahfil-e-zist mein bahut mah-o-nujum zau-fishan

in mein mera shumar kya ek diya bujha hua