main to samjha tha ki hai us se shanasai bahut

maiñ to samjhā thā ki hai us se shanāsā.ī bahut

us se mil kar huī lekin mirī rusvā.ī bahut

sab se ahmaq hai vo nādān bhī dīvāna bhī

jis ko lagtā hai ki rakhtā hai vo dānā.ī bahut

haañ bure vaqt meñ dete haiñ vo dhoka ik din

ham dil-o-jāñ se kareñ jin kī pazīrā.ī bahut

ik qadam bhī na haTā apnī ravish se maiñ kabhī

aur sab karte rahe bādiya-paimā.ī bahut

qaul aur fe'l meñ dekhā hai tazād un ke bhī

jin kī duniyā meñ hai mash.hūr masīhā.ī bahut

ab to aa jā ki tire bin huā jiinā mushkil

dil ko bechain kiyā kartī hai tanhā.ī bahut

'izzat-e-nafs baḌhāne meñ lagā thā 'dā.em'

tujh se milne pe milī hai mujhe rusvā.ī bahut

main to samjha tha ki hai us se shanasai bahut

us se mil kar hui lekin meri ruswai bahut

sab se ahmaq hai wo nadan bhi diwana bhi

jis ko lagta hai ki rakhta hai wo danai bahut

han bure waqt mein dete hain wo dhoka ek din

hum dil-o-jaan se karen jin ki pazirai bahut

ek qadam bhi na haTa apni rawish se main kabhi

aur sab karte rahe baadiya-paimai bahut

qaul aur fe'l mein dekha hai tazad un ke bhi

jin ki duniya mein hai mashhur masihai bahut

ab to aa ja ki tere bin hua jina mushkil

dil ko bechain kiya karti hai tanhai bahut

'izzat-e-nafs baDhane mein laga tha 'daem'

tujh se milne pe mili hai mujhe ruswai bahut