main toDun ahd-o-paiman-e-wafa ye ho nahin sakta

maiñ toḌūñ ahd-o-paimān-e-vafā ye ho nahīñ saktā

vo hote haiñ to ho jaa.eñ judā ye ho nahīñ saktā

pilā saaqī ki shaġhl-e-mai-kashī kā vaqt jaatā hai

yūñhī chhā.ī rahe kaalī ghaTā ye ho nahīñ saktā

vo chashm-e-surmagīñ jab tak masīhā.ī na farmā.e

marīz-e-ġham ko ho jaa.e shifā ye ho nahīñ saktā

na dekhe shaiḳh tū jab tak butoñ ko merī āñkhoñ se

nazar aa.e tujhe shān-e-ḳhudā ye ho nahīñ saktā

vo baaz aa.eñ jafā-o-jaur se ye ġhair-mumkin hai

maiñ chhoḌūñ ḳhū-e-taslīm-o-razā ye ho nahīñ saktā

nadāmat ho mujhe apnī jafā par ye to mumkin hai

tirā dil ho pashīmān-e-jafā ye ho nahīñ saktā

pasandīda na ho 'sīmāb' kyuuñ tarz-e-suḳhan terī

na laa.e rañg faizān-e-humā ye ho nahīñ saktā

main toDun ahd-o-paiman-e-wafa ye ho nahin sakta

wo hote hain to ho jaen juda ye ho nahin sakta

pila saqi ki shaghl-e-mai-kashi ka waqt jata hai

yunhi chhai rahe kali ghaTa ye ho nahin sakta

wo chashm-e-surmagin jab tak masihai na farmae

mariz-e-gham ko ho jae shifa ye ho nahin sakta

na dekhe shaiKH tu jab tak buton ko meri aankhon se

nazar aae tujhe shan-e-KHuda ye ho nahin sakta

wo baz aaen jafa-o-jaur se ye ghair-mumkin hai

main chhoDun KHu-e-taslim-o-raza ye ho nahin sakta

nadamat ho mujhe apni jafa par ye to mumkin hai

tera dil ho pashiman-e-jafa ye ho nahin sakta

pasandida na ho 'simab' kyun tarz-e-suKHan teri

na lae rang faizan-e-huma ye ho nahin sakta