main un ko kabhi had se guzarne nahin dunga

maiñ un ko kabhī had se guzarne nahīñ dūñgā

is tark-e-ta.alluq ko maiñ chalne nahīñ dūñgā

tum laakh uchhālā karo alfāz ke sho.ale

firdaus-e-mohabbat ko maiñ jalne nahīñ dūñgā

karnā hī paḌe chāhe sabā se mujhe sāzish

maiñ aap ke gesū ko sañvarne nahīñ dūñgā

māyūs nigāhoñ se tum ā.īna na dekho

maiñ apnī nigāhoñ ko badalne nahīñ dūñgā

bārīk sahī laakh kisī shoḳh kā āñchal

nazroñ ko maiñ shīshe meñ utarne nahīñ dūñgā

jab us kī bichhaḌte hue bhar ā.eñgī āñkheñ

kis tarah maiñ sāvan ko barasne nahīñ dūñgā

vo chāhe 'alīm' ab kabhī aa.eñ ki na aa.eñ

tā-umr maiñ palkoñ ko jhapakne nahīñ dūñgā

main un ko kabhi had se guzarne nahin dunga

is tark-e-talluq ko main chalne nahin dunga

tum lakh uchhaala karo alfaz ke shoale

firdaus-e-mohabbat ko main jalne nahin dunga

karna hi paDe chahe saba se mujhe sazish

main aap ke gesu ko sanwarne nahin dunga

mayus nigahon se tum aaina na dekho

main apni nigahon ko badalne nahin dunga

barik sahi lakh kisi shoKH ka aanchal

nazron ko main shishe mein utarne nahin dunga

jab us ki bichhaDte hue bhar aaengi aankhen

kis tarah main sawan ko barasne nahin dunga

wo chahe 'alim' ab kabhi aaen ki na aaen

ta-umr main palkon ko jhapakne nahin dunga