main uski qaid se aazad bhi hota nahin tha

maiñ us kī qaid se āzād bhī hotā nahīñ thā

magar us qaid se nāshād bhī hotā nahīñ thā

bahut pahle se us ko chāñd kahtā aa rahā huuñ

ye tab kī baat hai jab chāñd bhī hotā nahīñ thā

usī chehre ko shiddat se bhulāne meñ lage haiñ

vahī chehra jo ham ko yaad bhī hotā nahīñ thā

mujhe hairat hai vo dil ab mujhī se bhar gayā hai

ki jo mere binā ābād bhī hotā nahīñ thā

hamāre dasht meñ koī parinde mārtā thā

sitam ye hai ki vo sayyād bhī hotā nahīñ thā

maiñ ḳhud se sīkhtā thā ḳhud-pasandī kā hunar bhī

aur is fan kā koī ustād bhī hotā nahīñ thā

main us ki qaid se aazad bhi hota nahin tha

magar us qaid se nashad bhi hota nahin tha

bahut pahle se us ko chand kahta aa raha hun

ye tab ki baat hai jab chand bhi hota nahin tha

usi chehre ko shiddat se bhulane mein lage hain

wahi chehra jo hum ko yaad bhi hota nahin tha

mujhe hairat hai wo dil ab mujhi se bhar gaya hai

ki jo mere bina aabaad bhi hota nahin tha

hamare dasht mein koi parinde marta tha

sitam ye hai ki wo sayyaad bhi hota nahin tha

main KHud se sikhta tha KHud-pasandi ka hunar bhi

aur is fan ka koi ustad bhi hota nahin tha