main ye dekh ke bhi ruka nahin ki ghubar tha

maiñ ye dekh ke bhī rukā nahīñ ki ġhubār thā

mujhe rāste kā pata nahīñ ki ġhubār thā

vo hujūm sā jo umaD paḌā thā mire liye

mujhe dekhne ko milā nahīñ ki ġhubār thā

mirī rif’ateñ mujhe yak-ba-yak na samajh sakīñ

kahīñ munkashif maiñ huā nahīñ ki ġhubār thā

mire saa.e ko na daraḳht the na ‘imārateñ

mujhe āsmāñ kā pata nahīñ ki ġhubār thā

ka.ī baar mere qarīb se vo guzar gayā

mujhe phir bhī koī gila nahīñ ki ġhubār thā

kabhī paañv rakkhā to phūñk kar ki na uTh sake

kabhī tole par to uḌā nahīñ ki ġhubār thā

mujhe Thokaroñ ne girā diyā to pata chalā

koī sāmne se haTā nahīñ ki ġhubār thā

main ye dekh ke bhi ruka nahin ki ghubar tha

mujhe raste ka pata nahin ki ghubar tha

wo hujum sa jo umaD paDa tha mere liye

mujhe dekhne ko mila nahin ki ghubar tha

meri rif’aten mujhe yak-ba-yak na samajh sakin

kahin munkashif main hua nahin ki ghubar tha

mere sae ko na daraKHt the na ‘imaraten

mujhe aasman ka pata nahin ki ghubar tha

kai bar mere qarib se wo guzar gaya

mujhe phir bhi koi gila nahin ki ghubar tha

kabhi panw rakkha to phunk kar ki na uTh sake

kabhi tole par to uDa nahin ki ghubar tha

mujhe Thokaron ne gira diya to pata chala

koi samne se haTa nahin ki ghubar tha