main yun hayat ki wadi-e-pur-KHatar mein raha

maiñ yuuñ hayāt kī vādī-e-pur-ḳhatar meñ rahā

charāġh jaise koī āñdhiy.oñ ke ghar meñ rahā

tamām ḳhauf-o-tahayyur ke bām-o-dar meñ rahā

maiñ ajnabī kī tarah ḳhud hī apne ghar meñ rahā

na kuchh davā meñ na kuchh dast-e-chāra-gar meñ rahā

nazar ke zaḳhm kā marham isī nazar meñ rahā

hisār-e-zāt se bāhar kabhī nikal na sakā

misāl-e-āb-e-guhar maiñ sadā guhar meñ rahā

pasand aaya na dāmān-e-reg-zār-e-karam

maiñ ashk ban ke bhī apnī hī chashm-e-tar meñ rahā

maiñ us kī dost-navāzī se ḳhuub vāqif huuñ

azal se vaqt ke hamrāh maiñ safar meñ rahā

na dushmanī na adāvat na dostī na ḳhulūs

sivā.e sūd-o-ziyāñ kyā hai ab bashar meñ rahā

na jaane kaun sī manzil kī justujū hai mujhe

hamesha pā-e-talab merā rahguzar meñ rahā

usī se gulshan-e-hastī mahak uThā hai 'shafīq'

jo ḳhaar marg-e-azal se dil-e-bashar meñ rahā

main yun hayat ki wadi-e-pur-KHatar mein raha

charagh jaise koi aandhiyon ke ghar mein raha

tamam KHauf-o-tahayyur ke baam-o-dar mein raha

main ajnabi ki tarah KHud hi apne ghar mein raha

na kuchh dawa mein na kuchh dast-e-chaara-gar mein raha

nazar ke zaKHm ka marham isi nazar mein raha

hisar-e-zat se bahar kabhi nikal na saka

misal-e-ab-e-guhar main sada guhar mein raha

pasand aaya na daman-e-reg-zar-e-karam

main ashk ban ke bhi apni hi chashm-e-tar mein raha

main us ki dost-nawazi se KHub waqif hun

azal se waqt ke hamrah main safar mein raha

na dushmani na adawat na dosti na KHulus

siwae sud-o-ziyan kya hai ab bashar mein raha

na jaane kaun si manzil ki justuju hai mujhe

hamesha pa-e-talab mera rahguzar mein raha

usi se gulshan-e-hasti mahak uTha hai 'shafiq'

jo KHar marg-e-azal se dil-e-bashar mein raha