main yun to KHwab ki tabir sochta bhi nahin

maiñ yuuñ to ḳhvāb kī ta.abīr sochtā bhī nahīñ

magar vo shaḳhs mire rat-jagoñ kā thā bhī nahīñ

mirā nasīb vo samjhā na baat ishāroñ kī

mirā mizāj ki maiñ saaf kah sakā bhī nahīñ

baḌī girāñ hai mirī jaañ ye kaifiyat mat pūchh

ki in laboñ pe gila bhī nahīñ duā bhī nahīñ

ye zindagī ke ta.āqub meñ roz kā phirnā

agarche is tarah jiine kā hausla bhī nahīñ

ye be-niyāz tabī.at ye be-ḳhudī ke rañg

ham apne aap se ḳhush bhī nahīñ ḳhafā bhī nahīñ

us ek shakl ko jis din se kho diyā hai 'asad'

mire darīche se ab chāñd jhāñktā bhī nahīñ

main yun to KHwab ki tabir sochta bhi nahin

magar wo shaKHs mere rat-jagon ka tha bhi nahin

mera nasib wo samjha na baat ishaaron ki

mera mizaj ki main saf kah saka bhi nahin

baDi giran hai meri jaan ye kaifiyat mat puchh

ki in labon pe gila bhi nahin dua bhi nahin

ye zindagi ke taaqub mein roz ka phirna

agarche is tarah jine ka hausla bhi nahin

ye be-niyaz tabiat ye be-KHudi ke rang

hum apne aap se KHush bhi nahin KHafa bhi nahin

us ek shakl ko jis din se kho diya hai 'asad'

mere dariche se ab chand jhankta bhi nahin