main zaban-e-KHalq par ek zamzama ban jaunga

maiñ zabān-e-ḳhalq par ik zamzama ban jā.ūñgā

is tarah bikhrūñgā maiñ ki qāfila ban jā.ūñgā

shab kī tanhā.ī meñ bhī tanhā nahīñ rah pāoge

maiñ tumhāre vāste ik mas.ala ban jā.ūñgā

gard-e-māzī se nikal kar hāl-o-mustaqbil ke biich

aatī jaatī lahr kā ik silsila ban jā.ūñgā

mujh tak aa kar yuuñ guzar jaanā to kuchh āsāñ nahīñ

har qadam par dā.era-dar-dā.era ban jā.ūñgā

be-sukūñ lamhāt meñ mujh ko barat kar dekhnā

maiñ sukūn-e-qalb kā ik vāsta ban jā.ūñgā

rāste masdūd hoñ to maiñ tumhāre vāste

irtiqā.ī manziloñ kā rābta ban jā.ūñgā

main zaban-e-KHalq par ek zamzama ban jaunga

is tarah bikhrunga main ki qafila ban jaunga

shab ki tanhai mein bhi tanha nahin rah paoge

main tumhaare waste ek masala ban jaunga

gard-e-mazi se nikal kar haal-o-mustaqbil ke bich

aati jati lahr ka ek silsila ban jaunga

mujh tak aa kar yun guzar jaana to kuchh aasan nahin

har qadam par daera-dar-daera ban jaunga

be-sukun lamhat mein mujh ko barat kar dekhna

main sukun-e-qalb ka ek wasta ban jaunga

raste masdud hon to main tumhaare waste

irtiqai manzilon ka rabta ban jaunga