main zindagi ki rah-e-pur-KHatar mein tanha tha

maiñ zindagī kī rah-e-pur-ḳhatar meñ tanhā thā

pata chalā ki maiñ us rahguzar meñ tanhā thā

ḳhushī thī is kī ki sab hī the shahr meñ apne

ġham is kā thā ki maiñ phir bhī nagar meñ tanhā thā

samajh sake na mujhe vo bhī jo the ḳhud mere

udaas yuuñ thā ki ḳhud apne ghar meñ tanhā thā

na thā koī mirā rahbar na koī merā rafīq

maiñ zindagī ke añdhere safar meñ tanhā thā

jahāñ meñ kahtā bhī kis se maiñ dil kā apne dard

maiñ us ḳharāba-e-be-bām-o-dar meñ tanhā thā

na thā koī jo masā.ib meñ saath detā mirā

hamesha narġha-e-barq-o-sharar meñ tanhā thā

ghirā huā thā maiñ ahl-e-jahāñ ke majma.a meñ

magar maiñ har nigah-e-dīda-var meñ tanhā thā

talāsh-e-zar meñ mire saath be-shumār the log

ba-īñ-hama maiñ ḳhud us shahr-e-zar meñ tanhā thā

vo apne dil meñ thā ik anjuman sajā.e hue

vo jo ki ahl-e-jahāñ kī nazar meñ tanhā thā

koī halīf thā merā na koī merā harīf

'valī' maiñ razm-gah-e-ḳhair-o-shar meñ tanhā thā

main zindagi ki rah-e-pur-KHatar mein tanha tha

pata chala ki main us rahguzar mein tanha tha

KHushi thi is ki ki sab hi the shahr mein apne

gham is ka tha ki main phir bhi nagar mein tanha tha

samajh sake na mujhe wo bhi jo the KHud mere

udas yun tha ki KHud apne ghar mein tanha tha

na tha koi mera rahbar na koi mera rafiq

main zindagi ke andhere safar mein tanha tha

jahan mein kahta bhi kis se main dil ka apne dard

main us KHaraba-e-be-baam-o-dar mein tanha tha

na tha koi jo masaib mein sath deta mera

hamesha nargha-e-barq-o-sharar mein tanha tha

ghira hua tha main ahl-e-jahan ke majma mein

magar main har nigah-e-dida-war mein tanha tha

talash-e-zar mein mere sath be-shumar the log

ba-in-hama main KHud us shahr-e-zar mein tanha tha

wo apne dil mein tha ek anjuman sajae hue

wo jo ki ahl-e-jahan ki nazar mein tanha tha

koi halif tha mera na koi mera harif

'wali' main razm-gah-e-KHair-o-shar mein tanha tha