majaz par bhi zara chashm-e-haq-numa karna

majāz par bhī zarā chashm-e-haq-numā karnā

butoñ kī yaad meñ ai dil ḳhudā ḳhudā karnā

butoñ kā sheva to hai zulm-e-nā-ravā karnā

magar ḳhabar nahīñ allāh ko hai kyā karnā

jo ho sake to pas-e-marg ye kiyā karnā

uThā ke haath mirī qabr par duā karnā

haiñ vo ye chāhte puurā mirā kahā karnā

mujhe bhī chāhiye ab tark-e-mudda.ā karnā

ḳhirām-e-nāz se pis jā.ūñ maiñ ki miT jā.ūñ

niyāz-mand ko aatā nahīñ gilā karnā

niyāz-nāma to pahuñchā.egā unheñ lekin

haq-e-payām bhī ai nāma-bar adā karnā

javān ho ke chhupā.eñ vo rāz-e-dil kyūñkar

ki shoḳhiyoñ ne sikhāyā nahīñ hayā karnā

jafā-o-jaur par ai dil na shikva muñh se nikāl

kahīñ na baiThe-biThā.e use ḳhafā karnā

harīs-e-lazzat-e-āzār ko ye aatā hai

sazā ke shauq meñ har fe.al nā-sazā karnā

tumhārā dhyān to har-vaqt ham ko rahtā hai

ḳhayāl kuchh to hamārā bhī tum ko thā karnā

kiyā hai ahd-e-mohabbat to phir nibāh bhī ho

batāo saaf na karnā hai tum ko yā karnā

riyā pasand nahīñ kibriyā ko ai 'hāmid'

ibādat us kī jo karnā to be-riyā karnā

majaz par bhi zara chashm-e-haq-numa karna

buton ki yaad mein ai dil KHuda KHuda karna

buton ka shewa to hai zulm-e-na-rawa karna

magar KHabar nahin allah ko hai kya karna

jo ho sake to pas-e-marg ye kiya karna

uTha ke hath meri qabr par dua karna

hain wo ye chahte pura mera kaha karna

mujhe bhi chahiye ab tark-e-muddaa karna

KHiram-e-naz se pis jaun main ki miT jaun

niyaz-mand ko aata nahin gila karna

niyaz-nama to pahunchaega unhen lekin

haq-e-payam bhi ai nama-bar ada karna

jawan ho ke chhupaen wo raaz-e-dil kyunkar

ki shoKHiyon ne sikhaya nahin haya karna

jafa-o-jaur par ai dil na shikwa munh se nikal

kahin na baiThe-biThae use KHafa karna

haris-e-lazzat-e-azar ko ye aata hai

saza ke shauq mein har feal na-saza karna

tumhaara dhyan to har-waqt hum ko rahta hai

KHayal kuchh to hamara bhi tum ko tha karna

kiya hai ahd-e-mohabbat to phir nibah bhi ho

batao saf na karna hai tum ko ya karna

riya pasand nahin kibriya ko ai 'hamid'

ibaadat us ki jo karna to be-riya karna