majbur-e-shab ko subh ka muKHtar dekh kar

majbūr-e-shab ko sub.h kā muḳhtār dekh kar

hairāñ hai aql vaqt kī raftār dekh kar

bīmār ko hai aap ke aane kā intizār

sab ro rahe haiñ hālat-e-bīmār dekh kar

ahbāb kī tasalliyāñ ḳhud zaḳhm ban ga.iiñ

ghabrā rahā huuñ kasrat-e-ġham-ḳhvār dekh kar

anjām-e-fasl-e-gul pe hai merī nigāh dost

ḳhuuñ ro rahā huuñ rang-e-chaman-zār dekh kar

kis ne falak kā chāñd zamīñ par bichhā diyā

aaya ḳhayāl rahguzar-e-yār dekh kar

shabnam ho jaise dāman-e-nargis meñ ḳhanda-zan

samjhā maiñ un kī chashm-e-guhar-bār dekh kar

phir mere ġhaur-o-fikr kī qismat jagā bhī de

muddat huī hai tujh ko ziyā-bār dekh kar

'aḳhtar' sukūn-e-dil ke sivā thī har ek shai

ham lauT aa.e raunaq-e-bāzār dekh kar

majbur-e-shab ko subh ka muKHtar dekh kar

hairan hai aql waqt ki raftar dekh kar

bimar ko hai aap ke aane ka intizar

sab ro rahe hain haalat-e-bimar dekh kar

ahbab ki tasalliyan KHud zaKHm ban gain

ghabra raha hun kasrat-e-gham-KHwar dekh kar

anjam-e-fasl-e-gul pe hai meri nigah dost

KHun ro raha hun rang-e-chaman-zar dekh kar

kis ne falak ka chand zamin par bichha diya

aaya KHayal rahguzar-e-yar dekh kar

shabnam ho jaise daman-e-nargis mein KHanda-zan

samjha main un ki chashm-e-guhar-bar dekh kar

phir mere ghaur-o-fikr ki qismat jaga bhi de

muddat hui hai tujh ko ziya-bar dekh kar

'aKHtar' sukun-e-dil ke siwa thi har ek shai

hum lauT aae raunaq-e-bazar dekh kar