majruh-e-arzu kabhi mera jigar na ho

majrūh-e-ārzū kabhī merā jigar na ho

minnat-shanās tīr-e-nazar dil agar na ho

mumkin hai ye ki zabt karūñ aañkh tar na ho

Dar hai kahīñ tarāvish-e-laḳht-e-jigar na ho

tīkhī nigah se dekh leñ ḳhanjar agar na ho

mumkin nahīñ ki tīr-e-nazar kārgar na ho

dāman ko kyoñ bachā.e hue jā rahe haiñ vo

pāmāl ġham kī ḳhaak sar-e-rahguzar na ho

anjān tum bane raho ye aur baat hai

aisā to kyā hai tum ko hamārī ḳhabar na ho

bīmār-e-ġham hai soz-e-alam kā phuñkā huā

har qatra ashk-e-surḳh kā Dar hai sharar na ho

haiñ sarfarosh lazzat-e-rāhat se āshnā

sardār kaun hai vo jise dard-e-sar na ho

aisā nishāna chāhiye nāvak-fagan mire

dil par lage jo tiir jigar ko ḳhabar na ho

sarmāya-dār-e-aib-e-vafā huuñ azal se maiñ

kuchh ġham nahīñ mujhe jo mata-e-hunar na ho

'bedil' ke dil se zulf kā jaatā nahīñ ḳhayāl

ye ḳhāna-e-ḳhudā kisī kāfir kā ghar na ho

majruh-e-arzu kabhi mera jigar na ho

minnat-shanas tir-e-nazar dil agar na ho

mumkin hai ye ki zabt karun aankh tar na ho

Dar hai kahin tarawish-e-laKHt-e-jigar na ho

tikhi nigah se dekh len KHanjar agar na ho

mumkin nahin ki tir-e-nazar kargar na ho

daman ko kyon bachae hue ja rahe hain wo

pamal gham ki KHak sar-e-rahguzar na ho

anjaan tum bane raho ye aur baat hai

aisa to kya hai tum ko hamari KHabar na ho

bimar-e-gham hai soz-e-alam ka phunka hua

har qatra ashk-e-surKH ka Dar hai sharar na ho

hain sarfarosh lazzat-e-rahat se aashna

sardar kaun hai wo jise dard-e-sar na ho

aisa nishana chahiye nawak-fagan mere

dil par lage jo tir jigar ko KHabar na ho

sarmaya-dar-e-aib-e-wafa hun azal se main

kuchh gham nahin mujhe jo mata-e-hunar na ho

'bedil' ke dil se zulf ka jata nahin KHayal

ye KHana-e-KHuda kisi kafir ka ghar na ho