majruh hai dil sine mein sad-chaak jigar bhi

majrūh hai dil siine meñ sad-chāk jigar bhī

kuchh kam nahīñ qātil tirā andāz-e-nazar bhī

aate hue Darte haiñ siyah-ḳhāne meñ mere

katrā ke nikal jaate haiñ anjum bhī qamar bhī

kyoñ darpai-e-īzā hai shab-e-hijr meñ zālim

kuchh tujh ko mo.azzin nahīñ allāh kā Dar bhī

jo aap kaheñ sab vo durust aur bajā hai

aiboñ ke sivā mujh meñ nahīñ koī hunar bhī

jaa.eñ to kahāñ jaa.eñ rihā ho ke qafas se

parvāz ke qābil na rahe baal bhī par bhī

ye ġham kī hama-gīrī kā aalam hai shab-e-hijr

maġhmūm nazar aate haiñ dīvār bhī dar bhī

is tarah se nākām mohabbat meñ na hotā

ai aah agar hotā zarā tujh meñ asar bhī

ab Dhang na.e sīkhe haiñ khul khele haiñ bilkul

sunte haiñ vo jaane lage aġhyār ke ghar bhī

ik aah nahīñ hai mirī rusvā.ī kā baa.is

badnām kareñge mujhe ye dīda-e-tar bhī

ġham-ḳhāne meñ mere koī tafrīq nahīñ hai

jis rang kī hai shaam yahāñ vaisī sahar bhī

aa jaatā hai ik vaqt mohabbat meñ kuchh aisā

rahtī hai nahīñ mujh ko zarā ḳhud kī ḳhabar bhī

kaaTe nahīñ kaTtī hai shab-e-ġham kī musībat

is raat kī hogī kahīñ allāh sahar bhī

'ishrat' mirī ulfat kā yaqīñ un ko na hogā

maiñ nazr karūñ apnā agar kaaT ke sar bhī

majruh hai dil sine mein sad-chaak jigar bhi

kuchh kam nahin qatil tera andaz-e-nazar bhi

aate hue Darte hain siyah-KHane mein mere

katra ke nikal jate hain anjum bhi qamar bhi

kyon darpai-e-iza hai shab-e-hijr mein zalim

kuchh tujh ko moazzin nahin allah ka Dar bhi

jo aap kahen sab wo durust aur baja hai

aibon ke siwa mujh mein nahin koi hunar bhi

jaen to kahan jaen riha ho ke qafas se

parwaz ke qabil na rahe baal bhi par bhi

ye gham ki hama-giri ka aalam hai shab-e-hijr

maghmum nazar aate hain diwar bhi dar bhi

is tarah se nakaam mohabbat mein na hota

ai aah agar hota zara tujh mein asar bhi

ab Dhang nae sikhe hain khul khele hain bilkul

sunte hain wo jaane lage aghyar ke ghar bhi

ek aah nahin hai meri ruswai ka bais

badnam karenge mujhe ye dida-e-tar bhi

gham-KHane mein mere koi tafriq nahin hai

jis rang ki hai sham yahan waisi sahar bhi

aa jata hai ek waqt mohabbat mein kuchh aisa

rahti hai nahin mujh ko zara KHud ki KHabar bhi

kaTe nahin kaTti hai shab-e-gham ki musibat

is raat ki hogi kahin allah sahar bhi

'ishrat' meri ulfat ka yaqin un ko na hoga

main nazr karun apna agar kaT ke sar bhi