makan-e-dil se jo uThta tha wo dhuan bhi gaya

makān-e-dil se jo uThtā thā vo dhuāñ bhī gayā

bujhī jo ātish-e-jāñ ziist kā nishāñ bhī gayā

bahut panāh thī us ghar kī chhat ke saa.e meñ

vahāñ se nikle to phir sar se āsmāñ bhī gayā

baḌhā kuchh aur tajassus jalā kuchh aur bhī zehn

haqīqatoñ ke ta.āqub meñ maiñ jahāñ bhī gayā

rahe na saath jo pachhtāve bhī to rañj huā

ki hāsil-e-safar-e-umr-e-rā.egāñ bhī gayā

bachche hue the to ek ek lamha ginte the

bikhar ga.e to phir andāza-e-zamāñ bhī gayā

nishān tak na rahā apne ġharq hone kā

dikhā.ī detā thā jo ab vo bādbāñ bhī gayā

bharā thā dāman-e-ḳhvāhish to hashr barpā thā

huā tahī to phir āvāza-e-sagāñ bhī gayā

ab is udaas havelī se apnā kyā rishta

makīñ ke saath hamāre liye makāñ bhī gayā

bisāt-e-dahr pe shah-māt ho ga.ī ham ko

'riyāz' vo bhī na haath aayā naqd-e-jāñ bhī gayā

makan-e-dil se jo uThta tha wo dhuan bhi gaya

bujhi jo aatish-e-jaan zist ka nishan bhi gaya

bahut panah thi us ghar ki chhat ke sae mein

wahan se nikle to phir sar se aasman bhi gaya

baDha kuchh aur tajassus jala kuchh aur bhi zehn

haqiqaton ke taaqub mein main jahan bhi gaya

rahe na sath jo pachhtawe bhi to ranj hua

ki hasil-e-safar-e-umr-e-raegan bhi gaya

bachche hue the to ek ek lamha ginte the

bikhar gae to phir andaza-e-zaman bhi gaya

nishan tak na raha apne gharq hone ka

dikhai deta tha jo ab wo baadban bhi gaya

bhara tha daman-e-KHwahish to hashr barpa tha

hua tahi to phir aawaza-e-sagan bhi gaya

ab is udas haweli se apna kya rishta

makin ke sath hamare liye makan bhi gaya

bisat-e-dahr pe shah-mat ho gai hum ko

'riyaz' wo bhi na hath aaya naqd-e-jaan bhi gaya