makan kahin to muqarrar ho la-makan ke liye

makāñ kahīñ to muqarrar ho lā-makāñ ke liye

nishāñ kahīñ to muayyan ho be-nishāñ ke liye

milā hai jism hameñ imtiyāz-e-jāñ ke liye

bashar vajūd meñ aayā hai imtihāñ ke liye

nigāh vaqf-e-jamāl-o-ḳhayāl mahv-e-jalāl

rah-e-fanā meñ haiñ do naqsh-e-pā nishāñ ke liye

muhīt-e-ishq kī maujeñ haiñ iztirāb-o-sukūñ

ki madd-o-jazr bane bahr-e-bekarāñ ke liye

huzūr-e-qalb hai sarmāya-e-hayāt-e-davām

nafas hai ḳhizr mirā umr-e-jāvedāñ ke liye

mirī namāz ko bahr-e-vuzū hai jām-e-tuhūr

salā-e-sāqi-e-kausar hai bas azaañ ke liye

hamāre dil meñ yaqīñ ko milī hai gunjā.ish

ki bas hai vus.at-e-kaun-o-makāñ gumāñ ke liye

chalī jo sāhil-e-umr-e-ravāñ se kashtī-e-tan

nafas se kaam mashiyyat ne bādbāñ ke liye

huā ye sho.ala-zabānī se sham.a kī raushan

ki mom ho hama-tan ātishīñ bayāñ ke liye

mirī nazar meñ hai ism-o-sifat kī jalvagarī

zabān-e-hāl hai shāhid mire bayāñ ke liye

kahā ye rahmat-e-bārī ne hai ye haq se ba.iid

ki vaqf ho koī jalva kisī makāñ ke liye

ayaañ ye husn-e-ḳhud-ārā kī ḳhud-numā.ī hai

ki nūr-e-ain hai chashm-e-jahāniyāñ ke liye

faroġh-e-ilm se raushan hai sham-e-bazm-e-suḳhan

salā-e-ām hai yārān-e-nukta-dāñ ke liye

baqā-e-zāt meñ hai mā-sivā fanā 'sāhir'

ye dil pe naqsh hai ta.avīz hirz-e-jāñ ke liye

makan kahin to muqarrar ho la-makan ke liye

nishan kahin to muayyan ho be-nishan ke liye

mila hai jism hamein imtiyaz-e-jaan ke liye

bashar wajud mein aaya hai imtihan ke liye

nigah waqf-e-jamal-o-KHayal mahw-e-jalal

rah-e-fana mein hain do naqsh-e-pa nishan ke liye

muhit-e-ishq ki maujen hain iztirab-o-sukun

ki madd-o-jazr bane bahr-e-bekaran ke liye

huzur-e-qalb hai sarmaya-e-hayat-e-dawam

nafas hai KHizr mera umr-e-jawedan ke liye

meri namaz ko bahr-e-wuzu hai jam-e-tuhur

sala-e-saqi-e-kausar hai bas azan ke liye

hamare dil mein yaqin ko mili hai gunjaish

ki bas hai wusat-e-kaun-o-makan guman ke liye

chali jo sahil-e-umr-e-rawan se kashti-e-tan

nafas se kaam mashiyyat ne baadban ke liye

hua ye shoala-zabani se shama ki raushan

ki mom ho hama-tan aatishin bayan ke liye

meri nazar mein hai ism-o-sifat ki jalwagari

zaban-e-haal hai shahid mere bayan ke liye

kaha ye rahmat-e-bari ne hai ye haq se baid

ki waqf ho koi jalwa kisi makan ke liye

ayan ye husn-e-KHud-ara ki KHud-numai hai

ki nur-e-ain hai chashm-e-jahaniyan ke liye

farogh-e-ilm se raushan hai sham-e-bazm-e-suKHan

sala-e-am hai yaran-e-nukta-dan ke liye

baqa-e-zat mein hai ma-siwa fana 'sahir'

ye dil pe naqsh hai tawiz hirz-e-jaan ke liye