malal sar pe qayamat uThane lagta hai

malāl sar pe qayāmat uThāne lagtā hai

vo uTh ke jab mire pahlū se jaane lagtā hai

vo dard hai ki mudāvā nahīñ koī jis kā

vo vaqt hai ki ḳhudā yaad aane lagtā hai

gudāz dil hai tabī'at hai shabnamī us kī

zarā sī baat par aañsū bahāne lagtā hai

vahī ghaḌī hai use dekhne ke laa.iq jab

hatheliyoñ meñ vo chehra chhupāne lagtā hai

isī liye to koī us kā ham-jalīs nahīñ

har ek shaḳhs ko vo āzmāne lagtā hai

isī liye to añdherā hai us kī duniyā meñ

charāġh tez havā meñ jalāne lagtā hai

kahīñ ḳhulūs na paayā isī liye shāyad

mire ḳhulūs kī qīmat lagāne lagtā hai

vahāñ pahuñch ke qadam aur jam ga.e mere

jahāñ pahuñch ke qadam Dagmagāne lagtā hai

vafā ḳhulūs kī tā'līm kaun de 'irfān'

zarā sī 'umr meñ bachcha kamāne lagtā hai

malal sar pe qayamat uThane lagta hai

wo uTh ke jab mere pahlu se jaane lagta hai

wo dard hai ki mudawa nahin koi jis ka

wo waqt hai ki KHuda yaad aane lagta hai

gudaz dil hai tabi'at hai shabnami us ki

zara si baat par aansu bahane lagta hai

wahi ghaDi hai use dekhne ke laiq jab

hatheliyon mein wo chehra chhupane lagta hai

isi liye to koi us ka ham-jalis nahin

har ek shaKHs ko wo aazmane lagta hai

isi liye to andhera hai us ki duniya mein

charagh tez hawa mein jalane lagta hai

kahin KHulus na paya isi liye shayad

mere KHulus ki qimat lagane lagta hai

wahan pahunch ke qadam aur jam gae mere

jahan pahunch ke qadam Dagmagane lagta hai

wafa KHulus ki ta'lim kaun de 'irfan'

zara si 'umr mein bachcha kamane lagta hai