malal ye hai masail ka hal banate hue

malāl ye hai masā.il kā hal banāte hue

gañvā ke baiTh ga.e aaj kal banāte hue

ghise-piTe hue lahjoñ meñ kuchh nahīñ rakkhā

nayā hī rañg nikālo ġhazal banāte hue

ba-zāhir ek hī pal meñ badal gayā sab kuchh

ka.ī zamāne lage ek pal banāte hue

kahāñ se DhūñD ke lāoge ab mire jaisā

ḳhayāl karte mujhe be-badal banāte hue

ajiib sho.ala-e-ehsās kī lapeT meñ haiñ

jhulaste jaate haiñ kāġhaz pe thal banāte hue

ye regzār ye andhī havā ye phuul sī jaan

bikhar chalā huuñ irāde aTal banāte hue

lahū meñ lahr uThātī hai us kī yaad to kyā

safīne chalte haiñ dariyā meñ chhal banāte hue

patā hai kitnī mashaqqat uThānī paḌtī hai

kisī ḳhayāl ko zarbul-masal banāte hue

malal ye hai masail ka hal banate hue

ganwa ke baiTh gae aaj kal banate hue

ghise-piTe hue lahjon mein kuchh nahin rakkha

naya hi rang nikalo ghazal banate hue

ba-zahir ek hi pal mein badal gaya sab kuchh

kai zamane lage ek pal banate hue

kahan se DhunD ke laoge ab mere jaisa

KHayal karte mujhe be-badal banate hue

ajib shoala-e-ehsas ki lapeT mein hain

jhulaste jate hain kaghaz pe thal banate hue

ye regzar ye andhi hawa ye phul si jaan

bikhar chala hun irade aTal banate hue

lahu mein lahr uThati hai us ki yaad to kya

safine chalte hain dariya mein chhal banate hue

pata hai kitni mashaqqat uThani paDti hai

kisi KHayal ko zarbul-masal banate hue